Blinkit News: బ్లింకిట్‌పై ప్రశంసల వర్షం.. సోషల్ మీడియాలో ఆకాశానికెత్తేస్తున్న నెటిజన్లు

Quick Commerce News: ఇ-కామర్స్ అభివృద్దితో కావలసిన వస్తువుని ఇంటి దగ్గరకే ఆర్డర్ చేసి తెప్పించుకునే సౌలభ్యం దొరికింది. కేవలం రెండు, మూడు రోజుల వ్యవధిలోనే దూరాన్ని బట్టి సదరు ఉత్పత్తి ఇంటికి చేరేంది. ఇప్పుడు మరో అడుగు ముందుకేసి కేవలం నిమిషాల టైంలోనే ఆయా ప్రొడక్ట్స్ డెలవరీ అవుతున్నాయి. క్విక్ కామర్స్ సేవల దిశగా పలు సంస్థలు ముందుకు సాగుతున్నాయి.

ఫుడ్ డెలివరీ బిజినెస్‌లో అగ్రగామిగా కొనసాగుతున్న జొమాటో.. ఇటీవల క్విక్ కామర్స్ రంగంలోకి ప్రవేశించింది. బ్లింకిట్ ద్వారా పలు సేవలను అందిస్తోంది. అయితే ఆ సంస్థ చేసిన ఓ చిన్న పని ఇప్పుడు నెట్టింట ప్రశంసలు దక్కించుకుంటుంది. కేవలం ఒకేఒక్క సందేశం పంపించి సోషల్ మీడియా యూజర్ల మనసు దోచేసింది.

ఆన్‌లైన్ కిరాణా డెలివరీ ప్లాట్‌ఫారమ్ బ్లింకిట్‌తో తనకు జరిగిన ఓ అనుభవాన్ని ఇటీవల ఒక కస్టమర్ సోషల్ మీడియాలో పంచుకున్నారు. ప్రభాత్ మోత్వాని అనే వ్యక్తి సదరు క్విక్ కామర్స్ యాప్ ద్వారా కొన్ని వస్తువులను ఆసుపత్రి నుంచి ఆర్డర్ చేశారు. అతని లొకేషన్ గమనించిన బ్లింకిట్.. ఆ ఆర్డర్‌కు ప్రైయారిటీ ఇచ్చింది. అతనితో పాటు కుటుంబ సభ్యులకు విషెస్ తెలిపింది.

'బ్లింకిట్ పంపించిన చిన్న సందేశం చాలా సంతోషాన్ని ఇచ్చింది. హాస్పిటల్ నుంచి ఆర్డర్ చేస్తున్నప్పుడు, నేను బ్లింకిట్‌లో ఈ సందేశాన్ని చూశాను: "మీ ఆర్డర్ ఆసుపత్రి నుంచి వచ్చినదని గమనించాము. మీకు, మీ ప్రియమైన వారికి మా హృదయపూర్వక శుభాకాంక్షలు పంపుతున్నాము. త్వరగా కోలుకోవాలని కోరుతున్నాము". వేలాది మంది కస్టమర్‌లకు సర్వీసు అందించే వారికి ఇది చాలా చిన్న విషయం, వారు విస్మరించవచ్చు. అయితే కొన్ని రోజులుగా ఆసుపత్రిలో ఉన్న వారి మానసిక స్థితిని ఇది మెరుగుపరుస్తుంది. కంపెనీలు తమ వ్యాపారాన్ని దాటి తమ కస్టమర్‌ల పట్ల నిజమైన శ్రద్ధ చూపడం చాలా గొప్ప విషయం' అంటూ ఆ మెసేజ్ స్క్రీన్‌షాట్ షేర్ చేశారు.

క్విక్ కామర్స్ ప్లాట్‌ఫారమ్ పంపించిన శుభాకాంక్షలను అనేక మంది లింక్డ్ఇన్ వినియోగదారులు ప్రశంసించారు. తమకు కూడా గతంలో జరిగిన ఈ తరహా అనుభవాలను పంచుకున్నారు. భారతీయ కంపెనీలు నెమ్మదిగా మరింత కస్టమర్-సెంట్రిక్‌గా మారుతున్నాయి. జొమాటో, బ్లింకిట్ అటువంటి చర్యల్లో ముందుంటాయని పలువురు కామెంట్స్ చేశారు. ఇతర కంపెనీల నుంచి కూడా ఈ తరహా మంచి పద్ధతులను అనుసరించాలని ఆశిస్తున్నట్లు పేర్కొన్నారు.