Silver: ఎగబడి మరీ వెండిని అమ్మేస్తున్నారు! కారణం తెలిస్తే ఆశ్చర్యపోతారు!

గత కొన్నేళ్లుగా బంగారం(Gold)తో పోటీపడుతూ వెండి ధరలు (Silver Prices) అసాధారణంగా పెరుగుతున్నాయి. ఒకప్పుడు సామాన్యుల బంగారం (Poor Man's Gold)గా పిలవబడే వెండి ధర ఇప్పుడు ఆకాశాన్నంటుతోంది. కిలో వెండి ధర ఏకంగా రూ. 1.90 లక్షల మార్కును దాటడం మార్కెట్ వర్గాలను, సాధారణ ప్రజలను ఆశ్చర్యానికి గురిచేస్తోంది. ఈ ధరల పెరుగుదల వల్ల తమ నిల్వలను నగదుగా మార్చుకునేందుకు పెద్ద ఎత్తున పాత వెండి మార్కెట్‌లోకి వస్తోంది.

మూడేళ్లలో మూడు రెట్లు

వెండి ధరలు పెరగడం ఒక్కసారిగా జరిగింది కాదు. 2020లో కిలో రూ. 70,000 వరకు పెరిగిన వెండి ధర ఆ తర్వాత తగ్గుముఖం పట్టినా.. 2023 నుండి వేగం పుంజుకుంది. 2024లో తొలిసారిగా రూ. లక్షను దాటిన వెండి ధర కొద్ది కాలంలోనే రూ. 1.80 లక్షలు దాటింది. నిజానికి ఈ ఏడాదిలోనే వెండి ధర రెట్టింపు అయ్యి, బంగారం కంటే ఎక్కువ రాబడిని ఇచ్చింది.

ధరల ప్రయాణం ఇలా..

• 2010కి ముందు: రూ. 30,000 లోపు
• 2020: రూ. 70,000 వరకు
• 2022: రూ. 55,000 సమీపంలో
• 2024 తొలిసారి: రూ. 1,00,000 దాటింది
• ప్రస్తుతం: రూ. 1,90,000 పైగా

ఈ స్థాయిలో వెండి ధరలు పెరగడంతో అనేకమంది పెట్టుబడిదారులు, గృహిణులు తమ వద్ద ఉన్న పాత వెండిని విక్రయించి లాభాలు స్వీకరించేందుకు మొగ్గు చూపుతున్నారు.
అమ్ముడుపోతున్న పాత వెండి: వెండి ధరలు భారీగా పెరిగినందునే ప్రజలు వినియోగించని పాత వెండి వస్తువులు, వెండి దిమ్మెలు, పాత ఆభరణాలు అమ్మేస్తున్నారు. సాధారణంగా నెలవారీగా 10-15 టన్నుల పాత వెండి మాత్రమే మార్కెట్‌లోకి వస్తుంది. కానీ, ఇటీవల కేవలం ఒకే వారంలో ఏకంగా 100 టన్నుల వెండి అమ్మకానికి వచ్చింది! ఇది సాధారణ సగటు కంటే దాదాపు 10 రెట్లు అధికం కావడం విశేషం.

ఎందుకు అమ్ముతున్నారు?

1. లాభాల స్వీకరణ: తక్కువ ధరలకు కొనుగోలు చేసినవారు, రికార్డు స్థాయి వెండి ధరలు చూసి లాభాలను తీసుకోవాలని భావిస్తున్నారు. ధర మళ్లీ తగ్గితే చాలా ఏళ్లు వేచి చూడాల్సి వస్తుందని వారి ఆలోచన.
2. ఆర్థిక అవసరాలు: పెళ్లిళ్ల సీజన్, విహారయాత్రలు వంటి ఖర్చుల కోసం ఇంట్లో నిల్వ ఉన్న వెండిని నగదుగా మార్చుకుంటున్నారు.
3. దిద్దుబాటు భయం: రూ. 2 లక్షలకు చేరుతుందనే అంచనాలతో కొనుగోలు చేసినవారు కూడా ఇటీవలి స్వల్ప ధరల దిద్దుబాటును చూసి వచ్చిన లాభంతో సంతృప్తి చెందుతున్నారు.

వెండి ధరల పెరుగుదలకు కారణాలు

వెండి ధరలు ఇంతలా పెరగడానికి కేవలం దేశీయ డిమాండే కాదు, అంతర్జాతీయ కారకాలు కూడా ఉన్నాయి. 2020 నుండి ప్రపంచవ్యాప్తంగా వెండి(Silver) డిమాండ్, సరఫరా కంటే ఎక్కువగా ఉంది. వెండిని చాలా తక్కువగా నేరుగా తవ్వుతారు. ఇది ఎక్కువగా బంగారం, సీసం (Lead), జింక్ వంటి వాటి తవ్వకాలలో ఉప-ఉత్పత్తి (By-product)గా లభిస్తుంది. అందువల్ల, ఉత్పత్తిని హఠాత్తుగా పెంచడం సాధ్యం కాదు. సోలార్ ప్యానెల్స్, ఎలక్ట్రానిక్స్ వంటి పరిశ్రమల్లో వెండి వినియోగం పెరుగుతోంది. ఇది కూడా వెండి గిరాకీని పెంచుతోంది. విశ్లేషకుల అంచనా ప్రకారం.. వెండి ధరల పెరుగుదల ఇక్కడితో ఆగేలా లేదు. సరఫరా కొరత మరింతగా పెరుగుతుండడంతో.. కిలో వెండి ధర త్వరలో రూ. 2 లక్షల మైలురాయిని దాటే అవకాశం ఉందని అంచనా వేస్తున్నారు. ఈ ట్రెండ్ కొనసాగితే వెండి పెట్టుబడిదారులకు మరిన్ని లాభాలు తెచ్చిపెట్టే అవకాశం ఉంది.