బంగారాన్ని వెనక్కి నెట్టేసిన వెండి.. ఒక్క రోజులోనే భారీ పెరుగుదల..కారణం ఏంటంటే..

గత కొన్నేళ్లలో ప్రపంచ కమోడిటీ మార్కెట్‌లో భారీగా మార్పులు చోటు చేసుకున్నాయి. ముఖ్యంగా వెండి ఇప్పుడు సాధారణ ఆభరణం లేదా వస్తువుల తయారీలో ఉపయోగించే లోహం మాత్రమే కాదు, ప్రపంచ ఆర్థిక వ్యవస్థలో కీలక పాత్ర పోషిస్తున్న వ్యూహాత్మక వనరుగా మారిపోయింది. పునరుత్పాదక శక్తి, సౌరశక్తి ప్యానెల్స్, ఎలక్ట్రిక్ వాహనాలు, ఆధునిక ఎలక్ట్రానిక్స్ వంటి పరిశ్రమల్లో వెండికి ఉన్న డిమాండ్ విపరీతంగా పెరగడంతో, గత పదేళ్లలో దీని ప్రాముఖ్యత అసాధారణంగా పెరిగింది. ఈ నేపథ్యంలో ప్రపంచంలోని పెద్ద దేశాలు, ముఖ్యమైన పెట్టుబడి సంస్థలు తమ దృష్టిని వెండి మార్కెట్‌పై మరింతగా కేంద్రీకరించడం ప్రారంభించాయి.

గత ఏడాది నుండి ప్రపంచ కేంద్ర బ్యాంకులు, పెట్టుబడి బ్యాంకులు వెండిని విలువైన ఆస్తిగా భావించి తమ ఖజానాల్లో నిల్వ చేయడం ప్రారంభించాయి. ముఖ్యంగా JP మోర్గాన్ అనేక వందల టన్నుల వెండిని తన నిల్వల్లో చేర్చుకోవడం మార్కెట్‌కు పెద్ద సంకేతాన్ని ఇచ్చింది. అలాగే అమెరికా, చైనా, ఆస్ట్రేలియా వంటి దేశాలు వెండిని కీలకమైన లోహంగా ప్రకటించడం దీని డిమాండ్‌ను మరింత బలోపేతం చేసింది. అదనంగా చైనా వెండి ఎగుమతులపై కఠిన నియంత్రణలు విధించడం వల్ల ప్రపంచ మార్కెట్లో సరఫరా తక్కువై, ధరలపై నేరుగా ప్రభావం చూపించింది. డిమాండ్ భారీగా పెరగడం, సరఫరా క్రమంగా తగ్గిపోవడం వెండి ధరలను ఆకాశానికెత్తే ప్రధాన కారణాలయ్యాయి.

ఈ నేపథ్యంలో బుధవారం, డిసెంబర్ 10న భారతీయ ఫ్యూచర్స్ మార్కెట్ అయిన MCXలో వెండి కిలో ధర చారిత్రాత్మక గరిష్టమైన రూ. 1,90,374ను తాకింది. ఇది వెండి ఇప్పటిదాకా చేరిన అత్యధిక స్థాయి. ఇదే సమయంలో బంగారం ధర మాత్రం 10 గ్రాములకు రూ.1,30,369 వద్ద స్థిరంగా ఉండటం గమనార్హం. అంటే విలువైన లోహాలలో ప్రస్తుతం బంగారంకంటే వెండినే పెట్టుబడిదారులు ఎక్కువగా ప్రాధాన్యతనిస్తున్నారని తెలుస్తోంది. అంతర్జాతీయ మార్కెట్లో కూడా ఇదే ధోరణి కొనసాగుతోంది. వెండి ఔన్స్ ధర మొదటిసారిగా 61.48 డాలర్ల రికార్డును నమోదు చేసింది. కేవలం పన్నెండు ట్రేడింగ్ రోజుల్లోనే వెండి 50 డాలర్ల నుంచి 60 డాలర్ల మార్కును దాటేసి ఇప్పుడు 70 డాలర్ల దిశగా దూసుకెళ్తుందనే అంచనాలు వెలువడుతున్నాయి.

ఈ పెరుగుదలకు మరో ప్రధాన కారణం అమెరికా ఫెడరల్ రిజర్వ్ వడ్డీ రేట్లపై మార్కెట్‌లో నెలకొన్న అంచనాలే. డిసెంబర్ 9-10 ద్రవ్య విధాన సమావేశంలో ఫెడ్ వడ్డీ రేట్లను 25 బేసిస్ పాయింట్లు తగ్గించే అవకాశం 90 శాతానికి చేరుకుంది. వడ్డీ రేట్లు తగ్గినప్పుడు బ్యాంకుల్లో డబ్బు నిల్వ చేయడం లాభదాయకం కాకపోవడంతో.. పెట్టుబడిదారులు తమ డబ్బును బంగారం, వెండి, స్టాక్ మార్కెట్లలోకి మళ్లించడం సాధారణం. ఈ అంచనా ముందుగానే వెండి ఫ్యూచర్స్ ధరలను భారీగా పైకెక్కించింది.

ఫ్యూచర్స్ మార్కెట్‌తో పాటు రిటైల్ మార్కెట్లో కూడా వెండి ధరలు గణనీయంగా పెరిగాయి. చెన్నై మార్కెట్లో కిలో వెండి ధర రూ.2,07,000 చేరడం పెట్టుబడిదారులకు మరింత ఆశ్చర్యాన్ని కలిగించింది. బుధవారం ఉదయం గరిష్ట ధరను తాకిన తర్వాత, మంగళవారం MCX మార్చి ఫ్యూచర్స్ కాంట్రాక్ట్ 3.48 శాతం పెరిగి ₹1,88,064 వద్ద ముగిసింది. ఇది రాబోయే నెలల్లో కూడా వెండి మార్కెట్‌లో ఉత్కంఠభరితమైన ట్రెండ్ కొనసాగుతుందని సూచిస్తోంది.