Bengaluru: మీరు ఉంటున్న అద్దె ఇల్లు కొనాలనుకుంటున్నారా? ఈ విషయాలు తెలుసుకోండి!

అద్దె ఇంట్లో ఉంటూ అదే ఇంటిని సొంతం చేసుకోవాలని అనుకోవడం చాలామంది అద్దెదారుల కల. పెరుగుతున్న అద్దెల దృష్ట్యా, తెలిసిన పరిసరాల్లోనే స్థిరపడటం సౌకర్యవంతంగా అనిపించవచ్చు. అయితే, కేవలం ఆ ఇల్లు మీకు బాగా తెలుసు కదా అని గుడ్డిగా కొనుగోలు చేయడం ప్రమాదకరమని న్యాయ నిపుణులు హెచ్చరిస్తున్నారు.దీని గురించి మరిన్ని వివరాల్లోకి వెళ్తే..

బెంగుళూరు (Bengaluru) వంటి మెట్రో నగరాల్లో అద్దెలు విపరీతంగా పెరుగుతున్న తరుణంలో, చాలామంది అద్దెదారులు తాము ఉంటున్న అపార్ట్‌మెంట్‌నే కొనుగోలు చేసేందుకు ఆసక్తి చూపుతున్నారు. ఉదాహరణకు, హెచ్‌ఎస్ఆర్ లేఅవుట్‌లో రూ. 23,000 అద్దె చెల్లిస్తున్న సందీప్ అనే వ్యక్తికి తన యజమాని ఆ ఇంటిని రూ. 80 లక్షలకు అమ్ముతానని ఆఫర్ ఇచ్చారు. ఇంటిపై ఉన్న మమకారంతో ఆయన కొనేయాలనుకున్నారు కానీ, లోతుగా విచారిస్తే ఆ ఆస్తిపై కోర్టు కేసులు (Litigation) ఉన్నాయని తేలింది. అందుకే అద్దెదారుల నియమాల (Tenant rules) ప్రకారం మీరు అద్దెదారుగా ఉన్నా, కొనుగోలుదారుగా మారేటప్పుడు అప్రమత్తంగా ఉండాలి.

1. అసలైన మార్కెట్ విలువను తెలుసుకోండి

మీరు ఉంటున్న ఇల్లు కదా అని యజమాని చెప్పిన ధరకే కొనేయకండి. ఆ బిల్డింగ్ వయస్సు, ప్రస్తుత పరిస్థితిని బట్టి ధరను నిర్ణయించాలి. స్థానిక బ్రోకర్లను సంప్రదించి, అదే అపార్ట్‌మెంట్‌లో లేదా ఆ ఏరియాలో ఇటీవల జరిగిన రిజిస్ట్రేషన్ల వివరాలు సేకరించండి. కేవలం సౌకర్యం కోసం మార్కెట్ రేటు కంటే ఎక్కువ చెల్లించడం తెలివైన పని కాదు.

2. చట్టపరమైన హక్కులు ఇవే..

ఇంటి మొదటి యజమాని నుండి ప్రస్తుత సెల్లర్ వరకు యాజమాన్య గొలుసు (Chain of Ownership) స్పష్టంగా ఉందో లేదో తనిఖీ చేయాలి. సేల్ డీడ్, కన్వేయెన్స్ డీడ్ వంటి పత్రాలను సబ్-రిజిస్ట్రార్ కార్యాలయంలో స్వయంగా సరిచూసుకోవాలి. యజమాని ఇచ్చిన కాపీలపైనే ఆధారపడకుండా, సర్టిఫైడ్ కాపీలను స్వయంగా తీసుకోవడం ఉత్తమం. హోమ్ లోన్ తీసుకోవడం వల్ల బ్యాంక్ కూడా తన వంతుగా లీగల్ వెరిఫికేషన్ చేస్తుంది కాబట్టి మీకు అదనపు భద్రత లభిస్తుంది.

3. భవనం వయస్సు , భవిష్యత్తు ఖర్చులు

పాత అపార్ట్‌మెంట్‌లు తక్కువ ధరకు లభించినప్పటికీ, భవిష్యత్తులో మెయింటెనెన్స్ ఖర్చులు భారీగా ఉండవచ్చు. ఆ బిల్డింగ్ స్ట్రక్చరల్ లైఫ్ ఎంత? ఏదైనా రీడెవలప్‌మెంట్ ప్లాన్ ఉందా? అనేది ముందే తెలుసుకోవాలి. సొసైటీ మీటింగ్‌లలో పాల్గొని భవనం పరిస్థితిని ఆరా తీయండి.

4. కేసులు , అప్పులు లేవని నిర్ధారించుకోండి

ఆస్తిపై ఎటువంటి కోర్టు వివాదాలు లేవని నిర్ధారించుకోవడానికి యజమాని పేరు మీద కోర్టు రికార్డులను శోధించాలి. అలాగే, ఆ ఇంటిపై ఏవైనా బ్యాంక్ అప్పులు (Mortgages/Encumbrances) ఉన్నాయా అనేది ఎన్కంబరెన్స్ సర్టిఫికేట్ (EC) ద్వారా తనిఖీ చేయాలి. ఆస్తిపై ఎటువంటి క్లెయిమ్‌లు లేవని సేల్ డీడ్‌లో స్పష్టంగా పేర్కొనాలి.

భావోద్వేగంతో కాకుండా వాస్తవాలతో ఆలోచించండి

అద్దె ఇంట్లో ఉండటం వల్ల మీకు ఆ ఇల్లు , పరిసరాలు బాగా తెలుస్తాయి, ఇది ఒక అడ్వాంటేజ్. కానీ ఇదే మీ జాగ్రత్తను తగ్గించకూడదు. అద్దెదారులుగా మీరు పాటించే రూల్స్ వేరు, కొనుగోలుదారుగా మీరు చేసే 'డ్యూ డిలిజెన్స్' వేరు. ధర విషయంలో బేరమాడండి, లీగల్ టైటిల్ క్లియర్ గా ఉంటేనే ముందడుగు వేయండి. బెంగళూరు (Bengaluru) వంటి నగరాల్లో ఇలాంటి విషయాల్లో జాగ్రత్త వహించడం ముఖ్యం. తద్వారా మీ కష్టార్జితం సురక్షితంగా ఉంటుంది , మీ సొంత ఇంటి కల నిజమైన సుఖాన్ని ఇస్తుంది.