భారీగా అప్పులు వద్దు, పెరుగుతున్న ఆదాయ అంతరం: సుబ్బారావు

కరోనా మహమ్మారి నేపథ్యంలో ఆదాయ అంతరాలు పెరుగుతున్నాయని ఆర్బీఐ మాజీ గవర్నర్ దువ్వూరి సుబ్బారావు ఆందోళన వ్యక్తం చేశారు. స్టాక్ మార్కెట్ ప్రస్తుత ర్యాలీపై కూడా ఆయన స్పందించారు. దేశీయ, విదేశీ సంస్థల నుండి భారీగా వస్తోన్న నిధుల ప్రవాహంపై ఆయన ఆందోళన వ్యక్తం చేశారు. దేశంలో ఇతర ఆస్తుల ధరల ర్యాలీకీ ఈ పెట్టుబడుల వరద కారణమని చెప్పారు. పెట్టుబడుల కోసం మిగులు నిధులున్న వ్యక్తులు, సంస్థలు ఈ ర్యాలీతో లబ్దిపొందుతున్నారన్నారు.

ఈ సంవత్సరం ఆర్థిక వ్యవస్థ వేగంగా కోలుకుంటుందనే ఆశలను కరోనా సెకండ్ వేవ్ వమ్ము చేసిందన్నారు. ఆర్బీఐ అంచనా వేసిన జీడీపీ వృద్ధి రేటు 9.5 శాతం సాధించినా రెండేళ్ల క్రితంతో పోలిస్తే ఇది తక్కువ అన్నారు. కరోనా నేపథ్యంలో పేద-ధనికుల మధ్య అంతరాలు పెరుగుతున్నాయని చెప్పారు.

చాలామంది ఉద్యోగాలు కోల్పోవడం, ఆర్థిక రికవరీ అన్ని రంగాల్లో సమానంగా లేకపోవడం ఇందుకు కారణమన్నారు. ప్రస్తుత స్టాక్ మార్కెట్ ర్యాలీ పెరుగుతున్న ఆర్థిక అసమానతలకు సూచిక అన్నారు. కరోనా సెకండ్ వేవ్ నేపథ్యంలో మరిన్ని అప్పులు సరికాదన్నారు. ఇప్పటికే ప్రభుత్వ రుణభారం పెరిగిందన్నారు.