తెలుగు రాష్ట్రాలకు హీట్ వేవ్ అలర్ట్.. ఈ జిల్లాల్లో వచ్చే వారం రోజుల పాటు తీవ్రమైన వడగాలులు

తెలుగు రాష్ట్రాలైన ఆంధ్రప్రదేశ్, తెలంగాణలలో వేసవి ఉష్ణోగ్రతలు గరిష్ట స్థాయికి చేరి, వడగాలుల తీవ్రత భయానకంగా మారింది. ఆంధ్రప్రదేశ్ రాష్ట్రం తీవ్రమైన వడగాలులతో సతమతమవుతోంది. రాబోయే రోజుల్లో రాష్ట్రంలోని పలు జిల్లాల్లో ఉష్ణోగ్రతలు 45°C నుండి ఏకంగా 47°C వరకు నమోదయ్యే ప్రమాదం ఉందని విపత్తు నిర్వహణ సంస్థ హెచ్చరించింది. ముఖ్యంగా ఉత్తరాంధ్ర, కోస్తా జిల్లాలైన శ్రీకాకుళం, విజయనగరం, పార్వతీపురం మన్యం, విశాఖపట్నం, అనకాపల్లి, కాకినాడ, కోనసీమ, తూర్పు, పశ్చిమ గోదావరి జిల్లాలతో పాటు గుంటూరు, బాపట్ల, పల్నాడు, ప్రకాశం జిల్లాలపై దీని ప్రభావం అత్యధికంగా ఉండనుంది.

రాష్ట్రవ్యాప్తంగా తీవ్ర వడగాలులు వీచే అవకాశం ఉన్న 71 మండలాలను అధికారులు గుర్తించగా, మరో 277 మండలాల్లో సాధారణ వడగాలుల ప్రభావం ఉండనుంది. మరోవైపు నెల్లూరు, చిత్తూరు, తిరుపతి, కర్నూలు, నంద్యాలలో 43°C నుండి 44°C వరకు, అనంతపురం, కడప, అన్నమయ్య జిల్లాల్లో 41°C నుండి 43°C వరకు ఉష్ణోగ్రతలు రికార్డు కావచ్చు. వచ్చే ఆదివారం వరకు ఈ వడగాలుల తీవ్రత ఇలాగే కొనసాగే అవకాశం ఉంది. రాయలసీమలోని కొన్ని ప్రాంతాల్లో వాతావరణ మార్పుల వల్ల అక్కడక్కడా ఉరుములతో కూడిన జల్లులు పడే అవకాశం ఉన్నప్పటికీ, అది వేసవి తాపాన్ని పెద్దగా తగ్గించలేదని అధికారులు స్పష్టం చేశారు.

తెలంగాణ వ్యాప్తంగా కూడా సుదీర్ఘమైన, తీవ్రమైన పొడి వాతావరణం నెలకొంది. రాష్ట్రంలోని మెజారిటీ జిల్లాల్లో పగటి ఉష్ణోగ్రతలు 41°C నుండి 44°C మధ్య నమోదవుతుండటంతో భారత వాతావరణ శాఖ (IMD) ఆరెంజ్ అలర్ట్ జారీ చేసింది. ఆదిలాబాద్, నిజామాబాద్, మహబూబ్‌నగర్ వంటి ఉత్తర, మధ్య జిల్లాలలో వరుస రోజులుగా ఎండలు మండిపోతున్నాయి. రాజధాని హైదరాబాద్‌లో కూడా పరిస్థితి అసాధారణంగా మారింది.

Also Read

ఎండలకు గుడ్ బై.. ఐఎండీ చల్లని కబురు.. వారం రోజుల ముందుగానే రుతుపవనాలు..

నగరంలో పగటి ఉష్ణోగ్రతలు 41°C కి చేరుతుండగా, రాత్రి పూట కూడా 31°C మేర వేడి కొనసాగుతోంది. గాలిలో తేమ, పొడి వాతావరణం కలవడం వల్ల సాయంత్రం వేళల్లో కూడా ఉక్కపోతతో ప్రజలు తీవ్ర అసౌకర్యానికి గురవుతున్నారు. ఐఎమ్‌డి నివేదిక ప్రకారం ఆదిలాబాద్, కొమరం భీమ్ ఆసిఫాబాద్, మంచిర్యాల, నిర్మల్, కరీంనగర్, నల్గొండ, సూర్యాపేట జిల్లాలను వడగాలుల తీవ్రత ఎక్కువగా ఉండే అత్యంత ప్రమాదకర ప్రాంతాలుగా గుర్తించారు.

తీవ్రమైన వడగాలుల నడుమే తెలంగాణలోని కొన్ని జిల్లాలకు ఐఎమ్‌డి ఎల్లో అలర్ట్ జారీ చేసింది. భద్రాద్రి కొత్తగూడెం, ఖమ్మం, నాగర్‌కర్నూల్, వనపర్తి ప్రాంతాలలో తీవ్రమైన ఉపరితల వేడి కారణంగా వాతావరణంలో అస్థిరత ఏర్పడి ఆకస్మికంగా ఉరుములు, మెరుపులతో కూడిన వర్షాలు పడే అవకాశం ఉంది. ఈ సమయంలో గంటకు 40 నుండి 50 కిలోమీటర్ల వేగంతో బలమైన ఈదురు గాలులు వీచే ప్రమాదం ఉందని, స్వల్పకాలికమైనప్పటికీ ఈ తుఫాను తరహా వాతావరణం పట్ల మధ్యాహ్నం, సాయంత్రం వేళల్లో ప్రజలు అప్రమత్తంగా ఉండాలని నిపుణులు సూచించారు.

తీవ్రమైన ఎండల కారణంగా డీహైడ్రేషన్, వడదెబ్బ తగిలే ప్రమాదం ఉన్నందున ప్రజలు అత్యంత జాగ్రత్తగా ఉండాలని వైద్యులు కోరుతున్నారు. ఉదయం 10 గంటల నుండి సాయంత్రం వరకు అత్యవసరమైతే తప్ప ఇళ్ల నుండి బయటకు రాకూడదు. రోజంతా పుష్కలంగా నీరు, మజ్జిగ, కొబ్బరినీళ్లు వంటి ద్రవపదార్థాలు తీసుకుంటూ ఉండాలి. బయటకు వెళ్లాల్సి వస్తే తేలికపాటి కాటన్ దుస్తులు ధరించాలి. ముఖ్యంగా వృద్ధులు, చిన్న పిల్లలు, గర్భిణీలు, ఇప్పటికే అనారోగ్య సమస్యలు ఉన్నవారు ఈ ఎండల పట్ల ప్రత్యేక శ్రద్ధ వహించి అప్రమత్తంగా ఉండాలని అధికారులు కోరారు.