Multibagger Stock: లక్షను రూ.12 లక్షలు చేసిన మల్టీబ్యాగర్ స్టాక్.. పెరుగుతూనే పోతోంది..!

Multibagger Stock: పిట్ట కొంచెం కూత ఘనం అన్నట్లు లాభాలను అందిస్తుంటాయి స్మాల్ అండ్ మిడ్ క్యాప్ స్టాక్స్. వార్తల్లో ఎక్కువగా ఫోకస్ కాని స్టాక్స్ తమ లాభాలతో ఒక్కసారిగా లైమ్ లైట్ లోకి వచ్చి అందరినీ ఆశ్చర్యానికి గురిచేస్తుంటాయి.

ఇప్పటి వరకు మనం మట్లాడుకున్నది స్మాల్ క్యాప్ కంపెనీ అయిన సర్వోటెక్ పవర్ సిస్టమ్స్ కంపెనీ షేర్ల గురించే. ఇది గడచిన రెండేళ్ల కాలంలో తనను నమ్మి డబ్బు పెట్టిన ఇన్వెస్టర్లకు సూపర్ లాభాలను అందించింది. ఈ క్రమంలో దాదాపు 1000 శాతానికి పైగా రిటర్న్స్ ఇచ్చింది. ఎనర్జీ సొల్యూషన్స్ అందించే వ్యాపారంలో కంపెనీ ఉంది.

ఈ ఏడాది ప్రారంభం నుంచే కంపెనీ షేర్లు దాదాపు 80 శాతం లాభపడ్డాయి. ప్రస్తుతం దీనిని చూస్తుంటే వరుసగా మూడో ఏడాది కూడా కంపెనీ షేర్లు ఇన్వెస్టర్లకు మల్టీబ్యాగర్ రాబడులను అందించవచ్చని మార్కెట్ వర్గాలు భావిస్తున్నాయి. సర్వోటెక్ పవర్ సిస్టమ్స్ సెప్టెంబర్ 03, 2021న తొలిసారి బీఎస్ఈలో ట్రేడింగ్ ప్రారంభఇంచింది. అప్పట్లో ఈ కంపెనీ షేర్ల ధర కేవలం రూ.5 మాత్రమే. కానీ ఈరోజు స్టాక్ ధరను గమనిస్తే మార్కెట్లో 5 శాతం లాభపడి రూ.61.10 వద్ద ఉంది.

ప్రస్తుతం ఈ కంపెనీ మార్కెట్ క్యాప్ రూ.650 కోట్లుగా ఉంది. పైగా స్టాక్ తన కొత్త 52 వారాల గరిష్ఠ ధరను నమోదు చేసింది. గడచిన 20 నెలల్లో స్టాక్ ఏకంగా 1,054.76 శాతం లాభపడింది. అంటే సెప్టెంబర్ 3, 2021న ఒక ఇన్వెస్టర్ సర్వోటెక్ పవర్ షేర్లలో రూ.లక్ష పెట్టుబడిగా పెట్టి దానిని ఇప్పటి వరకు కొనసాగించి ఉంటే.. ప్రస్తుత మార్కెట్ విలువ ప్రకారం పెట్టుబడి విలువ రూ.12.22 లక్షలకు చేరుకుని ఉండేది.

సోలార్ ఉత్పత్తులు, ఎలక్ట్రిక్ వాహనాల ఛార్జర్‌ల తయారీతో పాటు కంపెనీ ఇన్వర్టర్లు, యూపీఎస్ తయారీకి ప్రసిద్ధి చెందింది. అలాగే దిల్లీ కేంద్రంగా పనిచేస్తున్న కంపెనీ వైద్య పరికరాల తయారీలోనూ ఉంది. కంపెనీ ఆదాయం మార్చి త్రైమాసికంలో ఏడాది ప్రాతిపదికన 125.8% పెరిగి రూ.51.06 కోట్లకు చేరుకుంది. మొత్తం ఆదాయం 134 శాతం పెరిగి రూ.119.98 కోట్లుగా ఉంది.