లాభాల్లో ప్రారంభమై.. భారీ ఊగిసలాటలో స్టాక్ మార్కెట్లు

ముంబై: స్టాక్ మార్కెట్లు శుక్రవారం (జూన్ 25) లాభాల్లో ప్రారంభమై, ఆ తర్వాత భారీ నష్టాల్లోకి వెళ్లాయి. అంతలోనే కోలుకున్నట్లుగా కనిపించినప్పటికీ నష్టాల్లో ట్రేడ్ అవుతున్నాయి. రెండు రోజుల క్రితం సెన్సెక్స్ 53000 స్థాయిని తాకి కిందకు వచ్చింది. నిన్న దాదాపు 400 పాయింట్లు లాభపడి 52,699.00 పాయింట్ల వద్ద ముగిసింది. నిఫ్టీ 103.50 (0.66%) పాయింట్లు లాభపడి 15,790.45 పాయింట్ల వద్ద ముగిసింది. నేడు కూడా ప్రారంభంలో ఆ దూకుడు కనిపించినప్పటికీ, ఆ తర్వాత క్షీణించింది. ఇన్వెస్టర్లు లాభాల స్వీకరణకు మొగ్గు చూపడం ప్రభావం చూపింది. అమెరికా మార్కెట్లు గురువారం లాభాలతో ముగిశాయి.

సెన్సెక్స్ మధ్యాహ్నం గం.10.45 సమయానికి 26.09 (0.050%) పాయింట్లు నష్టపోయి 52,672.91 పాయింట్ల వద్ద, నిఫ్టీ 1.05 (0.0066%) పాయింట్లు లాభపడి 15,791.50 పాయింట్ల వద్ద ట్రేడ్ అయింది. గ్లెన్ మార్క్ ఫార్మా 1.32 శాతం ఎగిసింది. మెటల్, ఆటో స్టాక్స్ లాభాల్లో ఉన్నాయి.

బీఎస్ఈ 30 సూచీలో టాటా స్టీల్, మారుతీ, సన్ ఫార్మా, ఎస్బీఐ, ఐసీఐసీఐ బ్యాంక్, భారతీ ఎయిర్‌టెల్, టెక్ మహీంద్రా షేర్లు లాభాల్లో ఉన్నాయి. రిలయన్స్, ఇండస్‌ఇండ్ బ్యాంక్, HUL, కొటాక్ మహీంద్రా బ్యాంక్, నెస్లే ఇండియా షేర్లు నష్టాల్లో ఉన్నాయి.