కుప్పకూలిన మార్కెట్, సెన్సెక్స్ 1000 పాయింట్లు డౌన్: మూడ్రోజుల్లో రూ.7 లక్షల కోట్లు ఫట్

దేశీయ స్టాక్ మార్కెట్లు సోమవారం(ఫిబ్రవరి 07, 2022) భారీగా నష్టపోయాయి. బడ్జెట్‌కు ముందు, తర్వాత లాభపడిన సూచీలు, వరుసగా మూడు రోజుల పాటు మాత్రం నష్టాలను చవిచూశాయి. గతవారం చివరి రెండు సెషన్‌లలో స్వల్పంగా నష్టపోయినప్పటికీ, నేడు మాత్రం భారీగా పతనమయ్యాయి. దీంతో సెన్సెక్స్ మళ్లీ 58,000 దిగువకు, నిఫ్టీ 17,250 పాయింట్ల కిందకు వచ్చింది. ఉదయం ప్రతికూలంగా ప్రారంభమైన మార్కెట్లు, ఏ దశలోను కోలుకోలేదు. గంటగంటకీ మరింత క్షీణించాయి. ఉదయం దాదాపు 100 పాయింట్ల నష్టంతో ప్రారంభమై, అంతకంతకూ దిగజారి చివరకు 1000 పాయింట్లకు పైగా నష్టంతో ముగిసింది సెన్సెక్స్. ఇంట్రాడేలో ఓ సమయంలో 1300 పాయింట్లు పతనమైంది.

అందుకే మార్కెట్ పతనం

సెన్సెక్స్ స్టాక్స్‌లలో FII ఫేవరేట్ స్టాక్స్‌లో HDFC, HDFC బ్యాంకు, బజాజ్ ఫిన్ సర్వ్, బజాజ్ ఫైనాన్స్ వంటివి ఉన్నాయి. అయితే ఈ స్టాక్స్ 3 శాతం నుండి 3.5 శాతం మేర క్షీణించాయి. ఈ వారం నిఫ్టీ 17000 పాయింట్ల నుండి 16800 పాయింట్ల మధ్య ముగియవచ్చునని అంచనాలు ఉన్నాయి. అయితే FIIలు పెద్ద ఎత్తున వెనక్కి వెళ్లాయి.

దీనికి తోడు ముడి చమురు ధరలు పైపైకి చేరుకుంటూ, 100 డాలర్లను తాకే స్థాయిలో ఉండటం, అమెరికాలో వడ్డీ రేట్ల పెంపు వేగంగా సాగుతుండటం, ఐటీ షేర్లలో దిద్దుబాటు, ఆర్బీఐ మానిటరీ పాలసీ, ప్రాఫిట్ బుకింగ్ వంటి అంశాలు ప్రభావం చూపుతున్నాయి.

మూడ్రోజుల్లో రూ.7 లక్షల కోట్లు

మూడ్రోజుల్లో ఇన్వెస్టర్ల సంపద రూ.7 లక్షల కోట్లు హరించుకుపోయింది. నేడు యూరోపియన్ స్టాక్ మార్కెట్లు కూడా మిశ్రమంగా ఉన్నాయి. టాప్ 100 కంపెనీల మార్కెట్ క్యాపిటలైజేషన్ నేడు రూ.2.64 లక్షల కోట్లుగా ఉంది. రిలయన్స్, టీసీఎస్, HDFC బ్యాంకు, ఇన్ఫోసిస్, ఐసీఐసీఐ బ్యాంకు, HUL, స్టేట్ బ్యాంక్ ఆఫ్ ఇండియా, HDFC, బజాజ్ ఫైనాన్స్, భారతీ ఎయిర్టెల్ వరుసగా ఉన్నాయి.

నేడు సెన్సెక్స్, నిఫ్టీ ఇలా

సెన్సెక్స్ నేడు 58,549.67 వద్ద ప్రారంభమై, 58,549.67 పాయింట్ల వద్ద గరిష్టాన్ని, 57,299.05 పాయింట్ల వద్ద కనిష్టాన్ని తాకింది. నిఫ్టీ 17,456.30 పాయింట్ల వద్ద ప్రారంభమై, 17,536.75 పాయింట్ల వద్ద గరిష్టాన్ని, 17,119.40 పాయింట్ల వద్ద కనిష్టాన్ని తాకింది. సెన్సెక్స్ చివరకు 1,023.63 (1.75%) పాయింట్లు నష్టపోయి 57,621.19 పాయింట్ల వద్ద, నిఫ్టీ 302.70 (1.73%) పాయింట్లు క్షీణించి 17,213.60 పాయింట్ల వద్ద ముగిసింది. డాలర్ మారకంతో రూపాయి 74.69 వద్ద ముగిసింది.