భారీ లాభాల నుండి పడిపోయిన సూచీలు, ఫ్లాట్‌గా ముగిసిన మార్కెట్

ముంబై: దేశీయ స్టాక్ మార్కెట్లు మంగళవారం ఫ్లాట్‌గా ముగిశాయి. అంతర్జాతీయ మార్కెట్ సానుకూల సంకేతాలు, కరోనా కేసులు తగ్గడం వంటి వివిధ సానుకూల అంశాల నేపథ్యంలో ఉదయం భారీ లాభాల్లో ప్రారంభమైన మార్కెట్లు, ఆ తర్వాత ఇన్వెస్టర్లు ప్రాఫిట్ బుకింగ్‌కు మొగ్గు చూపడంతో నష్టాల్లోకి వెళ్లింది. ఆ తర్వాత స్వల్పంగా కోలుకున్నప్పటికీ మొత్తానికి ఫ్లాట్‌గా ముగిసింది. సెన్సెక్స్ 52,వేల దిగువనే ఉంది. నిఫ్టీ 15,575 పాయింట్లకు దిగువన ఉంది. సూచీలు రోజంతా భారీ ఊగిసలాటలో ఉన్నాయి. డాలర్‌తో రూపాయి మారకం విలువ 72.90గా ఉంది.

లాభాల్లో ప్రారంభమైన సెన్సెక్స్, నష్టాల్లోకి...

సెన్సెక్స్ నేడు ఉదయం 52,067.51 పాయింట్ల వద్ద ప్రారంభమై, 52,228.65 పాయింట్ల వద్ద గరిష్టాన్ని, 51,808.88 పాయింట్ల వద్ద కనిష్టాన్ని తాకింది. సెన్సెక్స్ చివరకు 2.56 (0.0049%) పాయింట్లు క్షీణించి 51,934.88 పాయింట్ల వద్ద ముగిసింది. నిఫ్టీ 15,629.65 పాయింట్ల వద్ద ప్రారంభమై, 15,660.75 వద్ద గరిష్టాన్ని, 15,528.30 వద్ద కనిష్టాన్ని తాకింది. నిఫ్టీ చివరకు 7.95 (0.51%) పాయింట్లు నష్టపోయి 15,574.85 పాయింట్ల వద్ద ముగిసింది. సెన్సెక్స్ చాన్నాళ్లకు 52వేల పాయింట్లు దాటింది. అయితే ఆ సంతోషం ఎంతోసేపు నిలవలేదు.

టాప్ గెయినర్స్, లూజర్స్

నేటి టాప్ గెయినర్స్ జాబితాలో ongc 3.52 శాతం, బజాజ్ ఫైనాన్స్ 2.93 శాతం, SBI 1.97 శాతం, HDFC 1.01 శాతం, బజాజ్ ఆటో 0.97 శాతం లాభపడ్డాయి.

టాప్ లూజర్స్ జాబితాలో ICICI బ్యాంకు 1.80 శాతం, అల్ట్రా టెక్ సిమెంట్ 1.63 శాతం, ఏషియన్ పేయింట్స్ 1.51 శాతం, యాక్సిస్ బ్యాంకు 0.69 శాతం, ఐటీసీ 0.65 శాతం నష్టపోయాయి.

మోస్ట్ యాక్టివ్ స్టాక్స్‌లో రిలయన్స్, ఎస్బీఐ, టాటా స్టీల్, బజాజ్ ఫైనాన్స్, అదానీ పోర్ట్స్ ఉన్నాయి.

రంగాలవారీగా..

నిఫ్టీ 50 స్టాక్స్ 0.05 శాతం, నిఫ్టీ మిడ్ క్యాప్ 0.58 శాతం నష్టపోయాయి. నిఫ్టీ ఎనర్జీ 0.34 శాతం, నిఫ్టీ ఐటీ 0.11 శాతం, నిఫ్టీ మీడియా 0.32 శాతం, నిఫ్టీ ఫార్మా 0.04 శాతం, లాభపడ్డాయి. నిఫ్టీ ఆటో 0.58 శాతం, నిఫ్టీ బ్యాంకు 0.53 శాతం, నిఫ్టీ ఫైనాన్షియల్ సర్వీసెస్ 0.11 శాతం, నిఫ్టీ ఎఫ్ఎంసీజీ 0.01 శాతం, నిఫ్టీ మెటల్ 0.78 శాతం, నిఫ్టీ పీఎస్‌యూ బ్యాంకు 0.57 శాతం, నిఫ్టీ రియాల్టీ 0.52 శాతం, నిఫ్టీ ప్రయివేటు బ్యాంకు 0.93 శాతం నష్టపోయాయి.