లాభాల్లో ముగిసిన స్టాక్ మార్కెట్లు, టాప్ గెయినర్స్ అండ్ లూజర్స్

ముంబై: స్టాక్ మార్కెట్లు మంగళవారం(14, సెప్టెంబర్) స్వల్ప లాభాల్లో ముగిశాయి. మిడ్ క్యాప్, స్మాల్ క్యాప్ సూచీలు భారీగా లాభపడ్డాయి. కొద్ది రోజులుగా మార్కెట్లు ఒడిదుడుకుల్లో ఉన్నాయి. అయితే సూచీలు మంగళవారం కోలుకున్నాయి. రోజంతా లాభాల్లో పయనించాయి. కీలక రంగాల్లో కొనుగోళ్ల మద్దతు లభించింది. అంతర్జాతీయ మార్కెట్ నుండి సానుకూల సంకేతాలు అందాయి. రిటైల్ ద్రవ్యోల్బణం తగ్గడం కలిసి వచ్చింది. ఈ పరిణామాల నేపథ్యంలో నేడు సూచీలు ఆద్యంతం లాభాల్లో పయనించాయి. ఏజీఎం సమావేశానికి ముందు జెడ్ఈఈఎల్ 40 శాతం మేర ఎగిసిపడింది.

సెన్సెక్స్ ఉదయం 58,482 పాయింట్ల వద్ద ప్రారంభమై, ఇంట్రాడేలో 58,482-58,214 పాయింట్ల మధ్య కదలాడింది. చివరకు 69.33 పాయింట్లు లేదా 0.12 శాతం లాభంతో 58,247 పాయింట్ల వద్ద క్లోజ్ అయింది. నిఫ్టీ 24.70 పాయింట్లు లేదా 0.14 శాతం లాభపడి 17,381 దగ్గర ముగిసింది. డాలర్ మారకంతో రూపాయి వ్యాల్యూ 73.69 వద్ద ముగిసింది. సెన్సెక్స్ 30 షేర్లలో 16 లాభపడ్డాయి. ఇండస్ఇండ్ బ్యాంక్, HCL టెక్, బజాజ్ ఆటో, ఎల్ అండ్ టీ, కొటాక్ మహీంద్రా బ్యాంక్, టెక్ మహీంద్రా, ఐటీసీ, టైటాన్, టీసీఎస్ షేర్లు రాణించాయి. నెస్లే, అల్ట్రాటెక్ సిమెంట్, టాటా స్టీల్, HDFC, HUL, బజాజ్ ఫిన్ సర్వ్, బజాజ్ ఫైనాన్స్, HDFC బ్యాంక్ షేర్లు నష్టపోయాయి.

ఫారెన్ ఇనిస్టిట్యూషనల్ ఇన్వెస్టర్స్(FIIs) సెప్టెంబర్ 13న రూ.1,419 కోట్ల షేర్లను కొనుగోలు చేశాయి. డొమెస్టిక్ ఇనిస్టిట్యూషనల్ ఇన్వెస్టర్స్ (DIIs) రూ.559 కోట్ల మేర కొనుగోలు చేశాయి. టాప్ ఫైవ్ స్టాక్స్‌లో ఇండస్ఇండ్ బ్యాంకు 4.07 శాతం, HCl టెక్ 2.54 శాతం, కొటక్ మహీంద్రా 1.67 శాతం, బజాజ్ ఆటో 1.62 శాతం, టెక్ మహీంద్రా 1.55 శాతం లాభపడ్డాయి. నష్టపోయిన స్టాక్స్‌లో HDFC 1.07శాతం, నెస్ట్లే 0.97 శాతం, అల్ట్రా టెక్ సిమెంట్ 0.87 శాతం, HUL 0.78 శాతం, టాటా స్టీల్ 0.74 శాతం నష్టపోయాయి.