జోబిడెన్ గెలుపు, ఇన్వెస్టర్లలో కొత్త ఉత్సాహం! కొనసాగుతుందా.. ప్రాఫిట్ బుకింగ్ ఉంటుందా?

దేశీయ స్టాక్ మార్కెట్లు సోమవారం(నవంబర్ 9) భారీ లాభాల్లో ముగిశాయి. అమెరికా అధ్యక్ష ఎన్నికల్లో జోబిడెన్ విజయం నేపథ్యంలో అంతర్జాతీయ, ఆసియా మార్కెట్లు కూడా దూసుకెళ్లాయి. బిడెన్ గెలుపును ఇన్వెస్టర్లు స్వాగతించినట్లుగా మార్కెట్ జోరును చూస్తే అర్థమవుతోంది. నేడు సెన్సెక్స్ 704.37 పాయింట్లు(1.68%) ఎగిసి 42,597.43 వద్ద, నిఫ్టీ 197.50 పాయింట్లు(1.61%) లాభపడి 12,461 పాయింట్ల వద్ద ముగిసింది.

అంతర్జాతీయ మార్కెట్లు లాభాల్లో

కరోనా మహమ్మారి నేపథ్యంలో చాలా రోజులుగా మార్కెట్లు నష్టాల్లో ఉన్నాయి. లాక్ డౌన్ అనంతరం కోలుకున్నప్పటికీ ఆల్ టైమ్ గరిష్టాన్ని తాకేందుకు నెలలు పట్టింది. తాజాగా ఆల్ టైమ్ గరిష్టాన్ని తాకడంతో పాటు దానిని దాటేసింది. జోబిడెన్ విజయం, అమెరికాలో త్వరలో ఉద్దీపన ప్యాకేజీ ప్రకటన వెలువడనుందనే సంకేతాలు ఉండటంతో అంతర్జాతీయ మార్కెట్లు భారీగా పుంజుకున్నాయి. బిడెన్ హయాంలో భారత ఐటీ కంపెనీలకు శుభవార్త ఉంటుందని భావిస్తున్నందున ఐటీ, ఫైనాన్షియల్ షేర్లు రాణించాయి.

ఇన్వెస్టర్లలో ఉత్సాహం

దేశీయంగా స్టాక్ మార్కెట్లు పుంజుకోవడానికి ఐటీ కంపెనీలకు జోబిడెన్ శుభవార్త చెబుతారనే అంచనాలతో పాటు దేశీయంగా ఆర్థిక వ్యవస్థ పట్టాలెక్కడం ఇన్వెస్టర్లలో ఉత్సాహం నింపింది. మ్యానుఫ్యాక్చరింగ్ డేటా, విద్యుత్ డిమాండ్ పెరగడం వంటివి కరోనా, ఆర్థిక వ్యవస్థపై నెలకొన్న భయాలను తొలగించేలా చేశాయి. దీంతో వరుసగా ఆరోరోజు మార్కెట్లు దూసుకెళ్లాయి.

ఆసియా మార్కెట్ల దూకుడు

ఆసియా మార్కెట్లయిన షాంఘై, హాంగ్‌కాంగ్, సియోల్, టోక్యో మార్కెట్లు లాభాల్లో ముగిశాయి. జపాన్ నిక్కీ 2 శాతం, ఆస్ట్రేలియా ఎక్స్‌జేవో మార్కెట్లు 1.75 శాతం, సౌత్ కొరియా కోస్పి 1.27 శాతం, హాంగ్‌కాంగ్ హాంగ్‌షెంగ్ 1.17 శాతం, షాంగై కాంపోజిట్ 1.85 శాతం, తైవాన్ సూచీలు 1.18 శాతం, సింగపూర్ సూచీలు 1.19 శాతం, ఇండోనేషియా సూచీలు 0.38 శాతం ఎగిశాయి. యూరోప్ మార్కెట్లు లాభాల్లో ఉన్నాయి. అయితే భారీగా ఎగిసిన మార్కెట్లు ఈ ఒరవడిని కొనసాగిస్తాయా లేదా అనేది ప్రశ్నే అంటున్నారు. జోబిడెన్ గెలుపు నేపథ్యంలో మార్కెట్లు అనూహ్యంగా పుంజుకోగా.. రానున్న రోజుల్లో ఇన్వెస్టర్లు లాభాల స్వీకరణకు మొగ్గు చూపే అవకాశాలు లేకపోలేదని అంటున్నారు.