సెన్సెక్స్ 600 పాయింట్లు డౌన్, నిఫ్టీ 14,500 దిగువకు..

ముంబై: దేశీయ స్టాక్ మార్కెట్లు గురువారం(మార్చి 25) భారీ నష్టాల్లో ప్రారంభమయ్యాయి. పీఎస్‌యూ బ్యాంకు సూచీ మూడు శాతానికి పైగా క్షీణించగా, ఆటో, ఎనర్జీ, ఐటీ సూచీలు 1 శాతం నుండి 2 శాతం మేర పడిపోయాయి. లక్ష్మీ ఆర్గానిక్ 20 శాతం ప్రీమియంతో ప్రారంభమైంది. కరోనా సెకండ్ వేవ్ ఆందోళన కలిగిస్తోంది. దీంతో మార్కెట్లు పతనమవుతున్నాయి.

ఈక్విటీ మార్కెట్‌లలో అమ్మకలు వెల్లువెత్తుతున్నాయి. మహారాష్ట్రంలో దాదాపు ఐదు నెలల తర్వాత రికార్డ్ స్థాయిలో కేసులు నమోదయ్యాయి. ఇది ఇన్వెస్టర్ల సెంటిమెంటును దెబ్బతీస్తోంది. అమెరికా డాలర్ మారకంతో రూపాయి ఫ్లాట్‌గా 72.59 వద్ద ట్రేడ్ అయింది. నిన్న 72.56 వద్ద క్లోజ్ అయింది.

49వేల పాయింట్ల దిగువకు సెన్సెక్స్

సెన్సెక్స్ నేడు ఉదయం 49,201.98 పాయింట్ల వద్ద ప్రారంభమై, 49,247.95 పాయింట్ల వద్ద గరిష్టాన్ని, 48,625.21 పాయింట్ల వద్ద కనిష్టాన్ని తాకింది. నిన్న ఏకంగా 870 పాయింట్లు నష్టపోయిన సెన్సెక్స్ నేడు ఉదయం సెషన్లో మరో 600 పాయింట్ల మేర క్షీణించింది.

నిఫ్టీ 14,570.90 పాయింట్ల వద్ద ప్రారంభమై, 14,575.60 పాయింట్ల వద్ద గరిష్టాన్ని, 14,359.75 పాయింట్ల వద్ద కనిష్టాన్ని తాకింది. ఉదయం గం.11.30 సమయానికి సెన్సెక్స్ 550.72 (1.12%) పాయింట్లు క్షీణించి 48,629 పాయింట్ల వద్ద, నిఫ్టీ 158.85 (1.09%) పాయింట్లు క్షీణించి 14,390 పాయింట్ల వద్ద ట్రేడ్ అయింది. సెన్సెక్స్ రెండు రోజుల్లో 1500 పాయింట్ల వరకు పడిపోయింది. సెన్సెక్స్ ఏకంగా 49వేల పాయింట్ల దిగువకు వచ్చింది.

టాప్ గెయినర్స్, లూజర్స్

నేటి మోస్ట్ యాక్టివ్ స్టాక్స్ టాటా మోటార్స్, టాటా స్టీల్, రిలయన్స్, SBI, అదానీ పోర్ట్స్ ఉన్నాయి.

నేటి టాప్ గెయినర్స్ జాబితాలో లార్సన్ 0.30 శాతం, గ్రాసీమా 0.17 శాతం, టెక్ మహీంద్రా 0.20 శాతం లాభపడ్డాయి.

టాప్ లూజర్స్ జాబితాలో మారుతీ సుజుకీ 3.68 శాతం, IOC 2.86 శాతం, టాటా మోటార్స్ 2.56 శాతం, భారతీ ఎయిర్‌టెల్ 2.61 శాతం, ఎస్బీఐ 2.38 శాతం నష్టపోయాయి.

రంగాలవారీగా..

నిఫ్టీ 50 స్టాక్స్ 1.14 శాతం, నిఫ్టీ మిడ్ క్యాప్ 2.38 శాతం నష్టపోయాయి. నిఫ్టీ ఆటో 2.51 శాతం, నిఫ్టీ బ్యాంకు 2.17 శాతం, నిఫ్టీ ఎనర్జీ 2.28 శాతం, నిఫ్టీ ఫైనాన్షియల్ సర్వీసెస్ 1.69 శాతం, నిఫ్టీ ఎఫ్ఎంసీజీ 1.71 శాతం, నిఫ్టీ ఐటీ 1.39 శాతం, నిఫ్టీ మీడియా 3.32 శాతం, నిఫ్టీ మెటల్ 2.28 శాతం, నిఫ్టీ ఫార్మా 1.47 శాతం, నిఫ్టీ పీఎస్‌యూ బ్యాంకు 5.06 శాతం, నిఫ్టీ రియాల్టీ 3.36 శాతం, నిఫ్టీ ప్రయివేటు బ్యాంకు 2.25 శాతం నష్టపోయాయి.