భారీ నష్టాల్లో స్టాక్ మార్కెట్లు: సరిహద్దు టెన్షన్, గ్లోబల్ మార్కెట్ షాక్

ముంబై: దేశీయ స్టాక్ మార్కెట్లు శుక్రవారం కుప్పకూలాయి. మార్కెట్లు ప్రారంభం నుండే నష్టాల్లో ఉన్నాయి. ఉదయం గం.9.45 సమయానికి 460 పాయింట్లకు పైగా నష్టపోయిన సెన్సెక్స్, మధ్యాహ్నం గం.11.50 సమయానికి 480 పాయింట్లు నష్టపోయి 38,812 పాయింట్ల వద్ద ఉంది. నిఫ్టీ కూడా 135 పాయింట్లు నష్టపోయి 11,393 పాయింట్ల వద్ద ఉంది. సెన్సెక్స్ ఓ సమయంలో 600 పాయింట్లు నష్టపోయింది. డాలర్ మారకంతో రూపాయి రూ.73.05 వద్ద ట్రేడ్ అవుతోంది. గురువారం అమెరికా మార్కెట్లు భారీ నష్టాలతో ముగిశాయి.

ప్రపంచ ఆర్థిక వ్యవస్థ కోలుకోవడానికి సమయం పడుతుందని విశ్లేషకులు అంచనా వేస్తున్నారు. దీంతో గ్లోబల్ మార్కెట్లు నష్టపోయి, ఆ ప్రభావం భారత మార్కెట్లపై పడింది. ఆసియా మార్కెట్లు రెండు వారాల కనిష్టానికి క్షీణించాయి. మరోవైపు, చైనాతో సరిహద్దు అంశం కూడా మార్కెట్లపై ప్రభావం చూపింది. టాప్ గెయినర్స్ జాబితాలో భారతీ ఇన్ప్రాటెల్, మారుతీ సుజుకీ, జీ ఎంటర్టైన్మెంట్, టీసీఎస్, హిండాల్కో ఉండగా, టాప్ లూజర్స్ జాబితాలో విప్రో, ఐసీఐసీఐ బ్యాంకు, యాక్సిస్ బ్యాంకు, యూపీఎల్, ఎస్బీఐ ఉన్నాయి.