Telangana: స్వయం సహాయక సంఘాలకు శ్రీనిధి నిధులు.. ఎన్నివేల కోట్లంటే..

Telangana: ఏప్రిల్ 1 నుంచి కొత్త ఆర్థిక సంవత్సరం ప్రారంభం అయ్యింది. ఈ క్రమంలో తెలంగాణంలోని స్వయం సహాయక సంఘాల రుణాలకు అవసరమైన నిధుల కేటాయింపు ప్రక్రియ మెుదలైంది. ఇందుకోసం స్త్రీ నిధి క్రెడిట్ కోఆపరేటివ్ ఫెడరేషన్ లిమిటెడ్ నుంచి కొత్త ఏడాదికి నిధులు అందుకోనున్నాయి.

శుక్రవారం నగరంలో జరిగిన తెలంగాణలోని మహిళా స్వయం సహాయక సంఘాలకు సంబంధించిన 10వ జనరల్ బాడీ సమావేశం నిధుల మంజూరుకు ఆమోదం తెలిపింది. దీంతో మహిళా సహాయక సంఘాలు దాదాపు రూ.2,710 కోట్లను రుణాల కోసం అందుకోనున్నాయి. ఈక్రమంలో మండల సమాఖ్య పదవీకాలాన్ని ప్రస్తుతం ఉన్న ఏడాది నుంచి మూడేళ్లకు పొడిగించడంతోపాటు ఎస్‌హెచ్‌జీ సభ్యులు మరణిస్తే రూ.5 లక్షల ఇన్సూరెన్స్ కవరేజీని అందించాలని సమావేశంలో నిర్ణయించారు.

తెలంగాణ స్త్రీ నిధి ఇతర రాష్ట్రాలకు రోల్ మోడల్ గా నిలిచిందని పంచాయత్ రాజ్ & గ్రామీణాభివృద్ధి శాఖ మంత్రి ఈ దయాకర్ రావు కొనియాడారు. రాజస్థాన్ ప్రభుత్వం దీనిని అనుకరిస్తోందని ఆయన తెలిపారు. గత 12 సంవత్సరాలుగా స్త్రీనిధి సమర్థవంతంగా పనిచేస్తోందని మంత్రి వెల్లడించారు. రాష్ట్రవ్యాప్తంగా మెుత్తం 1.59 లక్షల స్వయం సహాయక సంఘాల నుంచి 5.3 లక్షల మంది సభ్యులు వివిధ ప్రాజెక్టుల కోసం రుణాలు పొందినట్లు ఆయన వెల్లడించారు.