కరోనా దెబ్బ, పెరిగిన ఆటో డెబిట్ ట్రాన్సాక్షన్స్ తిరస్కరణలు

EMI, బిల్లుల చెల్లింపు వంటి ఆర్థిక వ్యవహారాల్లో వినియోగించే ఆటో డెబిట్ ట్రాన్సాక్షన్స్ తిరస్కరణ రేటు వరుసగా రెండో నెలలో పెరిగింది. లాక్ డౌన్ నేపథ్యంలో ఆర్థిక వ్యవస్థపై ఏర్పడిన ఒత్తిడికి ఇది నిదర్శనం. నేషనల్ ఆటోమేటెడ్ క్లియరింగ్ హౌస్(NACH) వివరాల మేరకు మే నెలలో మొత్తం 85.7 మిలియన్ ఆటో డెబిట్ ట్రాన్సాక్షన్స్‌లో 30.8 మిలియన్ (35.91 శాతం) ట్రాన్సాక్షన్స్ తిరస్కరణకు గురయ్యాయి. ఏప్రిల్ నెలలో 85.4 మిలియన్ ట్రాన్సాక్షన్స్‌లో 29.08 మిలియన్ (34.05శాతం) తిరస్కరించబడ్డాయి.

కరోనా వెలుగులోకి వచ్చాక క్రమంగా పెరుగుతూ వచ్చిన తిరస్కరణలు మార్చిలో కరోనా ముందుస్థాయికి చేరుకున్నాయి. అయితే సెకండ్ వేవ్ విజృంభణ, దాని కట్టడి కోసం రాష్ట్రాలు లాక్‌డౌన్ విధించడంతో మళ్లీ ప్రతికూల తిరస్కరణ రేట్లు పెరిగాయి. ఆటో డెబిట్ ట్రాన్సాక్షన్స్ తిరస్కరణకు పలు కారణాలు ఉన్నాయి.

కరోనా కట్టడి కోసం విధించిన కఠిన ఆంక్షలు, లాక్‌డౌన్ వంటి అంశాలు సామాన్యుల ఆదాయానికి గండి కొట్టాయి. ఇది ప్రధాన కారణం. ఆదాయం లేకపోవడంతో ఖాతాల్లో సరిపడా సొమ్ము లేకుండా పోయింది. గత ఏడాది కరోనా విజృంభణ సమయంలో తిరస్కరణలు భారీ స్థాయికి చేరుకోగా, ఈసారీ అదే పరిస్థితి కనిపించింది. ఉపాధి, ఉద్యోగాలు కోల్పోవడంతో సరైన సమయంలో EMIలు, ఇతర ఆర్థికపర చెల్లింపులు చేయలేకపోతున్నారు.