రిస్క్ ఆధారిత వర్గీకరణ: మ్యూచువల్ ఫండ్ సంస్థలకు సెబీ ఆర్డర్స్

డెట్ మ్యూచువల్ ఫండ్స్ కోసం రిస్క్ వర్గీకరణ మ్యాట్రిక్స్‌తో ముందుకు వచ్చింది సెక్యూరిటీస్ అండ్ ఎక్స్చేంజ్ బోర్డ్ ఆఫ్ ఇండియా(SEBI). ఇది క్రెడిట్ మరియు వడ్డీ రేటు రిస్క్ రెండింటిని పరిగణలోకి తీసుకుంటుంది. అన్ని రకాల డెట్ పథకాలను వడ్డీ రేట్లు, పరపతి రిస్క్ ఆధారంగా వర్గీకరించాలని మ్యూచువల్ ఫండ్స్ నిర్వహణ సంస్థలను (ఏఎంసీలు) సెబీ ఆదేశించింది. ఇందుకు సంబంధించి సమాచార టేబుల్‌ను 2021 డిసెంబర్ 1వ తేదీ నుండి తప్పనిసరిగా వెల్లడించాల్సి ఉంటుందని స్పష్టం చేసింది.

ఈ మేరకు సోమవారం నాడు ఆదేశాలు జారీ చేసింది. దీంతో ఇన్వెస్టర్లు తగిన సమాచారం తెలుసుకుని పెట్టుబడి నిర్ణయాలు తీసుకునేందుకు వీలు కలుగుతుందని మ్యూచువల్ ఫండ్స్ నిపుణులు చెబుతున్నారు. మ్యూచువల్ ఫండ్ అడ్వైజరీ కమిటీ సిఫార్సుల ఆధారంగా సెబీ ఈ నిర్ణయం తీసుకున్నది.

సెబీ ప్రకారం వడ్డీ రేటు రిస్క్‌ను మూడు రకాలుగా వర్గీకరిస్తారు. క్లాస్ వన్ అని పిలువబడే అతి తక్కువ రిస్క్ బకెట్, గరిష్టంగా ఒకసంవత్సరం వరకు మకాలే డ్యురేషన్, మోడరేట్ రిస్క్ బకెట్ (క్లాస్ 2) మూడేళ్ల వరకు, క్లాస్ 3 మూడేళ్లకు పైగా కాలపరిమితి.