SEBI News: చిన్న మెుత్తంలో పెద్ద షేర్లలో వాటా.. కొత్త కాన్సెప్ట్ తెస్తున్న సెబీ.. పూర్తి వివరాలు..

SEBI News: చిన్న రిటైల్ పెట్టుబడిదారులకు సైతం అధిక స్టాక్ ధర కలిగిన కంపెనీల్లో వాటాలు కొనాలని ఉంటుంది. అయితే వారి దగ్గర ఉండే మెుత్తం కనీసం కొన్ని సార్లు ఒక్క షేరు కొనుగోలు చేసేందుకు కూడా సరిపోదు. దీనికి పరిష్కారం చూపాలని సెబీ యోచిస్తోంది.

భారతదేశంలో షేర్ల పాక్షిక యాజమాన్యాన్ని ప్రవేశపెట్టడానికి సెబీ ఆసక్తిగా ఉంది. ఈ పద్ధతి ఇప్పటికే అమెరికా మార్కెట్లలో అనుమతించబడుతోంది. చాలా మంది భారతీయ పెట్టుబడిదారులు Apple, Meta, Alphabet వంటి ప్రముఖ కంపెనీల షేర్లలో పాక్షిక వాటాలను కొనుగోలు చేశారు. అయితే ఇలాంటి కాన్సెప్ట్ అమలు చేయాలంటే అందుకు సెబీ చట్టాలు, కంపెనీల చట్టాల్లో మార్పులు అవసరమని తెలుస్తోంది.

ఉదాహరణకు ప్రఖ్యాత టైర్ల తయారీ సంస్థ MRF షేర్ ధర రూ.1.09 లక్షలుగా ఉంది. ఒక చిన్న పెట్టుడిదారుడు లక్షకు పైగా పెట్టుబడితో ఒక్కో షేరును కొనలేరు. ఇందులో కొంత నిర్థిష్ట భాగాన్ని కొనుగోలు చేయటం ద్వారా పాక్షికంగా యాజమాన్యం పొందేందుకు వెసులుబాటు కలుగుతుంది. దేశంలో రూ.20,000 కంటే ఎక్కువ ధర కలిగిన కంపెనీలను గమనిస్తే.. పేజ్ ఇండస్ట్రీస్ రూ.39,612, హనీవెల్ ఆటోమేషన్ ఇండియా రూ.39,308, శ్రీ సిమెంట్ రూ.25,681, అబాట్ ఇండియా రూ.22,800, నెస్లే ఇండియా రూ.21,922గా ఉన్నాయి. ఇలాంటి ఖరీదైన షేర్లు భారత మార్కెట్లలో అనేకం ఉన్నాయి.

క్యాపిటల్ మార్కెట్ వాచ్‌డాగ్ పాక్షిక యాజమాన్యాన్ని తీసుకురావాలని ఆసక్తిగా ఉన్నట్లు సెబీ చైర్‌పర్సన్ మధాబి పూరీ బుచ్ ముంబైలోని గ్లోబల్ ఫిన్‌టెక్ ఫోరమ్‌లో మాట్లాడుతూ అన్నారు. అయితే ఖచ్చితంగా చెప్పాలంటే పాక్షిక యాజమాన్యం కాన్సెప్ట్‌కు సంబంధించిన చర్చలు ఇంకా ప్రారంభ దశలోనే ఉన్నాయి. ప్రస్తుతం దేశంలో రియల్ ఎస్టేట్ ఇన్వెస్ట్‌మెంట్ ట్రస్ట్‌లు లేదా REITలు కూడా పెట్టుబడిదారులకు పెద్ద రియల్ ఎస్టేట్ ప్రాజెక్ట్‌లో కొంత భాగాన్ని సొంతం చేసుకునే అవకాశాన్ని కల్పిస్తూ ఫేమస్ అయ్యాయి.