Sebi new rules: ఇన్వెస్టర్స్ నిధుల సేఫ్టీ కోసం సెబీ కొత్త నిబంధన.. స్టాక్ బ్రోకర్స్, క్లియరింగ్ మెంబర్స్ ఆటలకు

Sebi new rules: పెట్టుబడిదారుల ప్రయోజనం కోసం ఎప్పటికప్పుడు సెబీ కొత్త నిబంధనలు అమల్లోకి తీసుకురావడం తెలిసిందే. ఇందులో భాగంగా ఈసారి స్టాక్ బ్రోకర్లకు నియంత్రణ సంస్థ ఝలక్ ఇచ్చింది. క్లయింట్ల నిధులను బ్యాంక్ గ్యారెంటీలుగా వినియోగించుకోవడంపై నిషేధం విధించింది.ఈ నిర్ణయం మే 1 నుంచి అమల్లోకి రానుండగా.. సెప్టెంబర్ చివరి నాటికి ఉన్న అన్ని బ్యాంకు గ్యారెంటీలను క్లోజ్ చేయాలని ఆదేశించింది.

పెట్టుబడిదారుల సొమ్మును స్టాక్ బ్రోకర్లు దుర్వినియోగం చేయడాన్ని అరికట్టేందుకు సెబీ చేస్తున్న ప్రయత్నంలో ఇదొక భాగం. స్టాక్ బ్రోకర్లు (SB) మరియు క్లియరింగ్ మెంబర్స్ (CM) ప్రస్తుతం ఖాతాదారుల నిధులను బ్యాంకుల్లో తాకట్టు పెడుతున్నారు. తద్వారా క్లియరింగ్ కార్పొరేషన్‌లకు అధిక మొత్తంలో బ్యాంక్స్ గ్యారెంటీలు (BG) జారీ చేస్తున్నాయి. ఈ విధానం కారణంగా క్లయింట్ల నిధులు రిస్కులో పడుతున్నాయి. దీనిని మార్చడానికే ప్రస్తుతం సెబీ నడుం బిగించింది.

ఏదైనా విభాగంలోని స్టాక్ బ్రోకర్లు మరియు క్లియరింగ్ సభ్యుల యాజమాన్య నిధులు బ్యాంకుల్లో గ్యారెంటీగా పెట్టిన వాటికి, క్లయింట్ హోదాలో CM వద్ద జమ చేసిన SB యాజమాన్య నిధులకు ఈ ఫ్రేమ్‌ వర్క్ వర్తించదు. కానీ బ్రోకర్లు మరియు క్లియరింగ్ సభ్యుల ద్వారా క్లయింట్‌ల నిధులపై జారీ చేయబడిన BGల ప్రస్తుత స్థితిని స్టాక్ ఎక్స్ఛేంజీలు మరియు క్లియరింగ్ కార్పొరేషన్‌లు గమనించాలని సెబీ పేర్కొంది. ఖాతాదారుల సేవలకు ఎటువంటి అంతరాయం లేకుండా కొత్త విధానం అమలును పర్యవేక్షించాలని రెగ్యులేటర్ ఆదేశించింది.

ఈ పద్ధతి పూర్తిస్థాయిలో విజయవంతం కావడానికి స్టాక్ బ్రోకర్లు మరియు క్లియరింగ్ మెంబర్స్ నుంచి స్టాక్ ఎక్స్ఛేంజీలు మరియు క్లియరింగ్ కార్పొరేషన్లు ఎప్పటికప్పుడు రిపోర్ట్ తీసుకుంటూ ఉండాలని సెబీ తెలిపింది. బ్రోకర్ పేరు, ఎంటిటీ స్వభావం, మొత్తం బ్యాంక్ గ్యారెంటీ సహా అందులో క్లయింట్ల నిధుల నుంచి ఎంత మొత్తం మరియు యాజమాన్య నిధులు ఏ మేరకు అనే వివరాలను అందించాలని ఎక్స్ఛేంజ్ లను నియంత్రణ సంస్థ ఆదేశించింది. ఈ ఏడాది జూన్ 1 నుంచి రెండు వారాలకు ఒకసారి చొప్పున ఈ వివరాలతో నివేదిక సమర్పించాలని తెలిపింది.