Sebi News: ఇన్‌కం ట్యాక్స్ విభాగం బాటలోనే సెబీ అడుగులు.. ఆ విషయంలో కీలక నిర్ణయం

AI News: ప్రపంచమంతా ఇప్పుడు ఆర్టిఫిషియల్ ఇంటెలిజెన్స్ వెంట పరుగెడుతోంది. మెల్లమెల్లగా సాంప్రదాయ పద్ధతులను వదిలి పలు సంస్థలు AI వినియోగాన్ని మొదలుపెట్టాయి. ఆదాయపు పన్ను శాఖ ఈ టెక్నాలజీ ద్వారా ఇప్పటికే పన్ను ఎగవేతదారుల ఆటకట్టిస్తోంది. కాగా ఇప్పుడు సెబీ కూడా ఈ జాబితాలో చేరింది.

సెక్యూరిటీస్ అండ్ ఎక్స్ఛేంజ్ బోర్డ్ ఆఫ్ ఇండియా(SEBI) తన పరిశోధనల కోసం కృత్రిమ మేధస్సు (AI)ని ఉపయోగిస్తోందని మార్కెట్ రెగ్యులేటర్ కు చెందిన ఓ సీనియర్ అధికారి తెలిపారు. మార్కెట్ పారదర్శకంగా ఉన్నంత వరకు మరియు ఎటువంటి అవకతవకలు జరగనంత వరకు బాగానే ఉంటుందన్నారు. అయితే ఈ తరహా ఇబ్బందులు తలెత్తే మందే వాటిని గుర్తించాల్సిన అవసరం ఉందన్నారు.

మార్కెట్లలో జరుగుతున్న అన్ని సాంకేతిక పరిణామాలను సంస్థ తప్పనిసరిగా ట్రాక్ చేయాల్సిన అవసరం ఉందని సెబీ యొక్క పూర్తి కాల సభ్యులు కమలేష్ చంద్ర వర్ష్నే అభిప్రాయపడ్డారు. చట్టానికి కట్టుబడి ఉండాల్సిన బాధ్యత ప్రతి ఒక్కరిపై ఉందన్నారు. ఈ విషయంలో AI వినియోగం మరింత ప్రయోజనకరంగా ఉంటుందని, ఉల్లంఘనలు సమస్యలను ఎదుర్కొనేందుకు సిద్ధం చేస్తుందని అంచనా వేశారు.

అసోసియేషన్ ఆఫ్ నేషనల్ ఎక్స్ఛేంజ్ మెంబర్స్ ఆఫ్ ఇండియా 13వ అంతర్జాతీయ సదస్సులో ఆయన మాట్లాడారు. పరిశోధనల కోసం AIని ఉపయోగిస్తున్నామని తెలిపారు. భవిష్యత్తులో మరిన్ని విషయాల్లోనూ ఈ సాంకేతికత విరివిగా వినియోగించుకోనున్నట్లు చెప్పారు. దీన్ని గుర్తించి జాగ్రత్తగా వ్యవహరించాలని మార్కెట్‌లో అవకతవకలకు పాల్పడే బ్రోకర్లను హెచ్చరించారు.