sebi: పెట్టుబడిదారులకు సెబీ సూచన.. మార్చి 31 లోపు ఈ పని చేయకపోతే..

sebi: పెట్టుబడిదారుల ప్రయోజనాలు కాపాడేందుకు సెక్యూరిటీస్ ఎక్స్ఛేంజ్ బోర్డ్ ఆఫ్ ఇండియా(SEBI) ఎప్పటికప్పుడు పలు చర్యలు తీసుకుంటూ ఉంటుంది. వాటిలో భాగంగా డీమ్యాట్ ఖాతాలకు నామినీలను జోడించాలని దాదాపు రెండేళ్ల క్రితమే ఆదేశించింది. అయితే అందుకు తుది గడువు ఈ నెలాఖరుతో ముగియనుంది. కాబట్టి ట్రేడర్లు, ఇన్వెస్టర్లు ఈ విషయంపై దృష్టి సారించాల్సిన అవసరం ఉంది.

లావాదేవీలు స్తంభించడం తప్పదు:

ట్రేడింగ్, డీమ్యాట్ అకౌంట్ హోల్డర్లు వారి ఖాతాలకు తప్పనిసరిగా నామినీలను ఎంచుకోవడం లేదా పూర్తిగా రద్దు చేసుకోవడం చేయాలని సెబీ ఆదేశించింది. 2021లోనే మార్కెట్ రెగ్యులేటరీ ఈ నిబంధన తీసుకొచ్చింది. అయితే ఈనెల 31తో ఇందుకు గడువు ముగియనుంది. ఒకవేళ ఈ పని పూర్తి చేయకపోతే, ఆయా అకౌంట్లకు సంబంధించిన లావాదేవీలు స్తంభింప చేయబడతాయి అని నియంత్రణ సంస్థ హెచ్చరించింది. ఈ గడువుకి ఇంకా 15 రోజులే ఉండటంతో.. పెట్టుబడిదారులు త్వరగా ప్రక్రియ పూర్తి చేయాలని సూచించింది.

ఇప్పటికే ఏడాదిపాటు పొడిగించిన గడువు:

నామినీ జోడింపు పూర్తిచేయని వారి అకౌంట్లను మార్చి 31 నుంచి స్తంభింపజేయనున్నట్లు సెబీ తన తాజా సర్క్యులర్ లో పేర్కొంది. గతేడాది మార్చి 31 వరకు మొదట సమయం ఇచ్చింది. కానీ వివిధ వర్గాల నుంచి వచ్చిన విజ్ఞప్తుల మేరకు ఈ గడువును ఏడాదిపాటు పొడిగించింది. అయితే ఇప్పటికే నామినీని యాడ్ చేయడం పూర్తి చేసిన వారు మరోసారి చేయాల్సిన అవసరం లేదని సెబీ స్పష్టం చేసింది.

ఇవి తప్పనిసరి కాదు:

నామినీ ప్రక్రియను రెండంచెల భద్రతా ప్రమాణాలను వినియోగించాల్సి ఉంటుందని సెబీ పేర్కొంది. స్టాక్ బ్రోకర్, డిపాజిట్ పార్టిసిపెంట్స్ ద్వారా ఈ పని పూర్తి చేయాలని స్పష్టం చేస్తుంది. అయితే నామినీల ఇ-మెయిల్ అడ్రస్, మొబైల్ నంబర్ వంటివి తప్పనిసరి కాదని పేర్కొంది. అక్టోబర్ 1 తరువాత ట్రేడింగ్ లేదా డీమ్యాట్ అకౌంట్ తీసుకుంటున్న వారు డిక్లరేషన్ ఫారం సమర్పిస్తే సరిపోతుందని తెలిపింది.