బ్యాంక్రప్టసీ: కేంద్రం ఆ సవరణలకు సుప్రీం కోర్టు సమర్థన

నేషనల్ కంపెనీ లా ట్రైబ్యునల్(NCLT)లో దివాలా పిటిషన్ దాఖలు చేయడానికి కనీసం 100 మంది గృహ కొనుగోలుదారులు కలిసి రావాలని సవరించిన ఇన్సాల్వెన్సీ అండ్ బ్యాంక్రప్టసీ కోడ్(IBC) 2020ను మంగళవారం సుప్రీం కోర్టు సమర్థించింది. రియల్ ఎస్టేట్ సంస్థలపై చర్యల కోసం గత ఏడాది దివాలా చట్టానికి పార్లమెంటు సవరణలు చేసింది. దీనిని భారత అత్యున్నత న్యాయస్థానం సమర్థించింది.

దీనికి సంబంధించి శాసన వ్యవస్థకు దురుద్దేశాలు ఆపాదించలేమని తేల్చి చెప్పింది. ఎవరైనా బిల్డర్ ఒప్పందం ప్రకారం తన బాధ్యత నెరవేర్చకపోతే ఆ ప్రాజెక్టులో ఇల్లు లేదా ప్లాట్ కొన్న ఓ వ్యక్తి అయినా దివాలా ప్రక్రియను చేపట్టేందుకు ఇదివరకు అవకాశం ఉండేది. అయితే గత ఏడాది దీనిని వందమంది కొనుగోలుదారులు లేదా కేటాయింపులు పొందిన వారిలో కనీసం పది శాతం మందికి పెంచుతూ సవరణలు ఆమోదించింది.

రియల్ ఎస్టేట్ లాబీకి తలొగ్గి సవరణలు చేశారని పిటిషనర్ వాదనలు వినిపించగా, సుప్రీం కోర్టు దీనిని తోసుపుచ్చింది. కేవలం ఒక వ్యక్తికి బిల్డర్లపై దివాలా ప్రక్రియ చేపట్టే హక్కు ఉంటే అది దుష్పరిణామాలకు దారి తీస్తుందని తెలిపింది. జస్టిస్ రోహింటన్ ఫాలీ నారిమన్, కేఎం జోసెఫ్, నవీన్ సిన్హాలతో కూడిన ధర్మాసనం దీనిని విచారించింది.