HDFC, ICICI బ్యాంకుల కంటే SBI మేలా? నిపుణులు చెబుతున్న సంచలన విషయాలు!

భారతదేశపు అతిపెద్ద ప్రభుత్వ రంగ బ్యాంకు అయిన స్టేట్ బ్యాంక్ ఆఫ్ ఇండియా (SBI) స్టాక్ మార్కెట్‌లో గత ఏడాది కాలంగా అప్రతిహతంగా దూసుకుపోతోంది. ఏడాది కాలంలో సుమారు 70 శాతం మేర లాభాలను అందించి ఇన్వెస్టర్ల పంట పండించింది. ఈ భారీ ర్యాలీతో హెచ్‌డిఎఫ్‌సి (HDFC), ఐసిఐసిఐ (ICICI) వంటి ప్రైవేట్ రంగ దిగ్గజ బ్యాంకులతో ఉన్న వాల్యుయేషన్ వ్యత్యాసాన్ని ఎస్‌బీఐ గణనీయంగా తగ్గించింది. మరి ఈ స్థాయిలో పెరిగిన తర్వాత SBI షేర్స్ ని ఇంకా హోల్డ్ చేయాలా? కొత్తగా కొనాలా లేక లాభాలను స్వీకరించాలా? (Profit Booking) అనే అంశంపై మార్కెట్ నిపుణులు ఆసక్తికర విశ్లేషణలు చేస్తున్నారు.

మార్కెట్ క్యాప్‌లో కొత్త రికార్డులు

ఎస్‌బీఐ ఇటీవల ఐటీ దిగ్గజం టీసీఎస్ (TCS) మార్కెట్ క్యాపిటలైజేషన్‌ ను కూడా అధిగమించి, భారతదేశంలో నాల్గవ అతిపెద్ద కంపెనీగా అవతరించింది. ప్రస్తుతం ఎస్‌బీఐ మార్కెట్ విలువ రూ.11 లక్షల కోట్ల మార్కును దాటింది. రిలయన్స్, హెచ్‌డిఎఫ్‌సి బ్యాంక్ , భారతీ ఎయిర్‌టెల్ మాత్రమే ప్రస్తుతం దీనికంటే ముందున్నాయి. ప్రభుత్వ రంగ బ్యాంకుల పట్ల ఇన్వెస్టర్లకు పెరుగుతున్న నమ్మకానికి ఇది నిదర్శనమని నిపుణులు చెబుతున్నారు.

వాల్యుయేషన్ లెక్కలు ఎలా ఉన్నాయి?

బ్యాంకింగ్ రంగంలో 'ప్రైస్-టు-బుక్' (P/B) మల్టిపుల్ అనేది అత్యంత కీలకమైన అంశం.

• • ఏడాది క్రితం ఎస్‌బీఐ P/B కేవలం 1.35 గా ఉండేది. కానీ, ఇప్పుడు అది 2.41 కి పెరిగింది.
• • పోలిక కోసం చూస్తే, హెచ్‌డిఎఫ్‌సి బ్యాంక్ 2.69 వద్ద.. ఐసిఐసిఐ బ్యాంక్ 2.92 వద్ద ఉన్నాయి.
• • అంటే ఒకప్పుడు ప్రైవేట్ బ్యాంకులతో పోలిస్తే చాలా తక్కువ ధరకు లభించే ఎస్‌బీఐ షేర్లు.. ఇప్పుడు దాదాపు వాటి స్థాయికి చేరువయ్యాయి.

నిపుణుల సలహా: బై, హోల్డ్ లేక సెల్?

వెల్త్‌మిల్స్ సెక్యూరిటీస్ డైరెక్టర్ క్రాంతి బతిని అభిప్రాయం ప్రకారం, ఎస్‌బీఐ తన అనుబంధ సంస్థల విలువను అన్లాక్ చేయడంలో విజయవంతమైంది. క్యూ3 ఫలితాలు కూడా బలంగా ఉండటంతో.. రాబోయే 12 నెలల్లో ఈ షేర్ ఇంకా 10-15 శాతం పెరిగే అవకాశం ఉందని ఆయన 'Buy' రేటింగ్ ఇచ్చారు.

మరోవైపు, మాస్టర్ క్యాపిటల్ సర్వీసెస్ చీఫ్ రీసెర్చ్ ఆఫీసర్ డాక్టర్ రవి సింగ్ మాట్లాడుతూ.. ఎస్‌బీఐ ఇప్పుడు తక్కువ ధరలో దొరకడం లేదని, ఇది 'ఫెయిర్లీ వాల్యూడ్' (సరైన ధర) వద్ద ఉందని హెచ్చరించారు. అయినప్పటికీ ప్రైవేట్ బ్యాంకులతో పోలిస్తే ఇంకా కొంత డిస్కౌంట్ లభిస్తోంది. కాబట్టి మరో 15-20 శాతం ర్యాలీకి అవకాశం ఉందని ఆయన అంచనా వేశారు.

ప్రైవేట్ బ్యాంకుల పరిస్థితి ఏమిటి?

హెచ్‌డిఎఫ్‌సి బ్యాంక్ విలీనం తర్వాత కొన్ని సవాళ్లను ఎదుర్కొంటోంది. దీనివల్ల దాని షేరు ధర పెద్దగా పెరగడం లేదు. యాక్సిస్ బ్యాంక్ విషయానికొస్తే, క్రెడిట్ కార్డ్ , పర్సనల్ లోన్ విభాగాల్లో ఒత్తిడి పెరగడం వల్ల ఇన్వెస్టర్లు కాస్త జాగ్రత్తగా ఉన్నారు. ఈ నేపథ్యంలో, స్థిరమైన ఆదాయం, మెరుగైన ఆస్తి నాణ్యత (Asset Quality) కలిగిన SBI షేర్ల వైపే చాలా మంది మొగ్గు చూపుతున్నారు.

మొత్తంగా చూస్తే.. ఎస్‌బీఐ ప్రాథమిక అంశాలు (Fundamentals) చాలా బలంగా ఉన్నాయి. మొండి బకాయిలు (GNPA) 1.57 శాతానికి తగ్గడం, నికర వడ్డీ మార్జిన్లు (NIMs) 3 శాతం వద్ద స్థిరంగా ఉండటం సానుకూల అంశాలు. అయితే, షేరు ధర ఇప్పటికే చాలా పెరిగినందున, స్వల్పకాలిక ఇన్వెస్టర్లు కొంత మేర లాభాలను స్వీకరించడం మంచిది. దీర్ఘకాలిక ఇన్వెస్టర్లు మాత్రం మరిన్ని లాభాల కోసం వేచి చూడవచ్చు.