ఎస్బీఐ వడ్డీ రేట్లు నవంబర్ 1 నుంచి మారుతున్నాయి...

మీకు స్టేట్ బ్యాంక్ ఆఫ్ ఇండియా (SBI)లో అకౌంట్ ఉందా? రిటైల్ పొదుపు ఖాతాల్లో డిపాజిట్లపై రేట్ల తగ్గింపు నవంబర్ 1వ తేదీ నుంచి వర్తిస్తుందని తెలిపింది. రిజర్వ్ బ్యాంక్ ఆఫ్ ఇండియా (RBI) రెపో రేటు తగ్గింపు నేపథ్యంలో రుణాలు తీసుకునే వారికి వడ్డీ తగ్గుతోంది. అదే సమయంలో డిపాజిటర్లకు కూడా బ్యాంకులు ఇచ్చే వడ్డీ శాతం తగ్గుతోంది. రూ.1 లక్ష వరకు సేవింగ్స్ అకౌంట్స్‌పై వడ్డీ రేటు 25 బేసిస్ పాయింట్స్ తగ్గించింది. ఎస్బీఐ వద్ద తగినంత లిక్విడిటీ ఉంది. దానికి తోడు ఆర్బీఐ రెపో రేటు తగ్గిస్తోంది. దీంతో డిపాజిట్లపై ప్రభావం పడుతోంది.

సేవింగ్ డిపాజిట్స్‌పై వడ్డీ రేటు

- రూ.1 లక్ష వరకు సేవింగ్స్ డిపాజిట్స్ పైన నవంబర్ 1, 2019 నుంచి వడ్డీ రేటు 3.50 శాతం నుంచి 3.25 శాతానికి తగ్గించింది.

- ఈ ఏడాది మే నెలలో ఎస్బీఐ లార్జ్ సేవింగ్స్ డిపాజిట్స్ రేట్లను ఆర్బీఐ రెపో రేటుకు అనుసంధానించింది.

- అలాగే, సెలెక్టివ్ మెచ్యూరిటీ ఫిక్స్డ్ డిపాజిట్లపై వడ్డీ రేటును అక్టోబర్ 10వ తేదీ నుంచి కుడా తగ్గించింది.

రూ.1 లక్షకు పైగా సేవింగ్ డిపాజిట్‌పై...

- రూ.1 లక్షకు పైగా ఉన్న సేవింగ్ డిపాజిట్ అకౌంట్స్ పైన వడ్డీ రేటు ఇప్పటి వరకు 3 శాతం ఉంది. ఇందులో ఎలాంటి మార్పు చేయలేదు ఎస్బీఐ.

- లార్జ్ బ్యాలెన్స్ సేవింగ్ అకౌంట్స్‌కు రెపో రేటును లింక్ చేసిన తొలి బ్యాంకు ఎస్బీఐ.

వారికి ఉచితం..

ఆదాయపు పన్ను చట్టంలోని సెక్షన్ 80 టీటీఏ కింద సంవత్సరానికి రూ.10,000 వరకు పొదుపు ఖాతా వడ్డీ పన్ను ఉచితం. సీనియర్ సిటిజన్లకు ఇది రూ.50,000 వరకు వర్తిస్తుంది.