SBI big update: జూలై 1 నుండి క్యాష్ విత్‌డ్రా, చెక్‌బుక్ కొత్త ఛార్జీలు

ప్రభుత్వరంగ దిగ్గజం స్టేట్ బ్యాంక్ ఆఫ్ ఇండియా(SBI) బేసిక్ సేవింగ్స్ బ్యాంక్ డిపాజిట్(BSBD) ఖాతాదారులకు షాక్. బేసిక్ సేవింగ్స్ అంటే జీరో బ్యాలెన్స్ అకౌంట్ కలిగి ఉన్న వారి నుండి జూలై 1వ తేదీ నుండి కొత్త సర్వీస్ ఛార్జీలు వసూలు చేయనుంది. నగదు ఉపసంహరణ, చెక్‌బుక్ పైన పరిమితులు విధించింది. ఆ పరిధి దాటితో ఛార్జీ వసూలు చేస్తామని తెలిపింది. అడిషనల్ వ్యాల్యూ యాడెడ్ సర్వీస్ జూలై 1, 2021 నుండి అమలులోకి వస్తుందని వెల్లడించింది.

4సార్లకు మించి తీస్తే వాత

SBIకి చెందిన ఏదైనా బ్రాంచీ, ఏటీఎంలో మొత్తం నాలుగుసార్లు మాత్రమే ఉచిత నగదు ఉపసంహరణకు అనుమతి ఉంది. నాలుగుసార్లకు మించి తీసుకోవాలనుకుంటే ప్రతిసారి రూ.15తో పాటు జీఎస్టీ అదనంగా చెల్లించాలి. ఇతర బ్యాంకుకు చెందిన ఏటీఎం నుండి నగదు తీసుకున్నా ఇదే తరహా ఛార్జీలు వర్తిస్తాయి. ఇకపై ఎస్బీఐ, ఎస్బీఐ-యేతర ఏటీఎంలు, ఎస్బీఐ బ్రాంచీలో కలిపి ఒక నెలలో 4సార్లు మాత్రమే డబ్బులు తీసుకునే అవకాశం ఉంటుంది.

చెక్కుబుక్కు పైన

ఒక ఫైనాన్షియల్ ఏడాదిలో మొదటి పది చెక్కు లీవ్స్ ఉచితం. ఆ తర్వాత 10 లీఫ్ చెక్కు బుక్ అయితే రూ.40తో పాటు జీఎస్టీ అదనం. 25 లీఫ్ చెక్కు బుక్ అయితే రూ.75తో పాటు జీఎస్టీ అదనం. ఎమర్జెన్సీ చెక్కు బుక్ అయితే 10 లీఫ్స్‌కు రూ.50తో పాటు జీఎస్టీ అదనంగా చెల్లించాలి. అయితే సీనియర్ సిటిజన్లకు ఇవి వర్తించవు.

ఇవి ఉచితం

బ్రాంచీ ఛానల్, ఏటీఎం, సీడీఎం నాన్ ఫైనాన్షియల్ ట్రాన్సాక్షన్స్ అయితే BSBD అకౌంట్ హోల్డర్లకు ఉచితం. ఎస్బీఐ లేదా ఇతర బ్యాంకుల్లో ఇది ఉచితం. ట్రాన్సుఫర్ ట్రాన్సాక్షన్స్ కూడా ఉచితం.