ఆ నిబంధనల మేరకు SBI రూ.9,000 కోట్ల సమీకరణ

ప్రభుత్వరంగ దిగ్గజం స్టేట్ బ్యాంక్ ఆఫ్ ఇండియా(SBI) దాదాపు రూ.9వేల కోట్ల నిధులను సమీకరించనుంది. ఇన్వెస్టర్లకు బాసెల్ 3 నిబంధనలకు లోబడి బాండ్స్ జారీ చేయడం ద్వారా రూ.8,931 కోట్లను సమీకరించాలని బోర్డు ఆమోదం తెలిపిందని ఎస్బీఐ తెలిపింది. బాసెల్ 3 నిబంధనలకు లోబడిన నాన్-కన్వెర్టబుల్, ట్యాక్సబుల్, సబ్ ఆర్డినేటెడ్, అన్‌సెక్యూర్డ్, ఫుల్లీ పెయిడెడ్ బాండ్స్‌తో ఈ మొత్తాన్ని సమీకరించేందుకు శుక్రవారం బ్యాంకు డైరెక్టర్ల కమిటీ ఆమోద ముద్ర వేసింది.

ఈ బాండ్ల ముఖ విలువ రూ.10 లక్షలు కాగా, 15 ఏళ్ల కాల వ్యవధితో వార్షిక కూపన్ రేటు 6.80 శాతం ఇస్తారు. బాండ్ సబ్‌స్క్రైబర్లకు పదేళ్ల కాల్ ఆప్షన్ ఉంటుంది. ఈ మేరకు ఎస్బీఐ తెలిపింది. బాసెల్ 3 క్యాపిటల్ రెగ్యులేషన్స్ ప్రకారం బ్యాంకులు తమ క్యాపిటల్ ప్లానింగ్ ప్రాసెస్‌ను మెరుగుపరుచుకోవాలి, బలోపేతం చేసుకోవాలి.

2013 నుండి విడతలవారీగా డొమెస్టిక్ బ్యాంకులు బాసెల్ 3 నిబంధనలను అమలు చేస్తున్నాయి. కాగా, ఫండ్ రెయిజింగ్ నేపథ్యంలో శుక్రవారం ఎస్బీఐ షేర్లు 198.10 వద్ద క్లోజ్ అయింది. అంతకుముందు సెషన్ కంటే 1.72 శాతం ఎగిసింది.