SBI కస్టమర్లకు అలర్ట్! వరుసగా 6 రోజులు బ్యాంక్ సెలవులు.. వెంటనే ఈ పనులు ముగించుకోండి!

మీకు స్టేట్ బ్యాంక్ ఆఫ్ ఇండియా (SBI) లో అకౌంట్ ఉందా? ఈ నెల చివర్లో బ్యాంకు బ్రాంచ్‌కు వెళ్లి చేయాల్సిన ముఖ్యమైన పనులు ఏమైనా ప్లాన్ చేసుకున్నారా? అయితే ఈ వార్త ఖచ్చితంగా మీ కోసమే. మే నెల చివరి వారంలో దేశవ్యాప్తంగా ఎస్బీఐ బ్రాంచ్‌లు వరుసగా ఆరు రోజుల పాటు మూతపడే అవకాశం ఉంది. బ్యాంక్ ఉద్యోగుల సంఘం పిలుపునిచ్చిన దేశవ్యాప్త సమ్మె, వారాంతపు సెలవులు , బక్రీద్ పండుగ సెలవులు అన్నీ ఒకేసారి రావడమే దీనికి ప్రధాన కారణం. ఈ సుదీర్ఘ సెలవుల (Bank holidays) వల్ల కస్టమర్లకు ఎలాంటి ఇబ్బందులు కలగకుండా ఉండాలంటే ముందే అలర్ట్ అవ్వడం మంచిది.

ఆరు రోజుల సెలవుల షెడ్యూల్ (మే 23 - మే 28)

• మే 23: నాల్గవ శనివారం (Fourగవ Saturday) కారణంగా దేశవ్యాప్తంగా బ్యాంకులు పనిచేయవు.
• మే 24: ఆదివారం సాధారణ వీక్లీ సెలవు.
• మే 25 & మే 26: ఆల్ ఇండియా స్టేట్ బ్యాంక్ ఆఫ్ ఇండియా స్టాఫ్ ఫెడరేషన్ (AISBISF) రెండు రోజుల దేశవ్యాప్త సమ్మెకు పిలుపునిచ్చింది.
• మే 27 & మే 28: బక్రీద్ (Bakrid) పండుగ సందర్భంగా పలు రాష్ట్రాల్లో ప్రభుత్వ సెలవులు ఉన్నాయి.

ఈ లెక్కన మే 23 నుండి మే 28 వరకు వరుసగా 6 రోజుల పాటు ఎస్బీఐ కస్టమర్లకు బ్రాంచ్ సేవలు అందుబాటులో ఉండకపోవచ్చు. ఇటీవల కాలంలో స్టేట్ బ్యాంక్ చరిత్రలోనే ఇది అత్యంత సుదీర్ఘమైన బ్రాంచ్ బంద్‌గా మారే అవకాశం ఉంది.

ఎస్బీఐ ఉద్యోగులు ఎందుకు సమ్మె చేస్తున్నారు?

ఈ సమ్మె ప్రధానంగా వర్క్‌మెన్ (Workmen) కేటగిరీకి చెందిన ఉద్యోగులపై ప్రభావం చూపనుంది. ఉద్యోగుల దీర్ఘకాలిక సమస్యలను మేనేజ్‌మెంట్ పట్టించుకోవడం లేదని, గతంలో జరిగిన ఒప్పందాలను సరిగ్గా అమలు చేయడం లేదని యూనియన్ ఆరోపిస్తోంది. ఈ మేరకు ఏఐఎస్‌బీఐఎస్‌ఎఫ్ (AISBISF) బ్యాంక్ యాజమాన్యానికి 16 డిమాండ్లతో కూడిన నోటీసును సమర్పించింది..

• కొత్త రిక్రూట్‌మెంట్లు: గత కొన్నేళ్లుగా మెసెంజర్, సపోర్ట్ స్టాఫ్ రిక్రూట్‌మెంట్‌ను నిలిపివేయడం వల్ల ఆ పోస్టులు పూర్తిగా తుడిచిపెట్టుకుపోయాయి. వెంటనే కొత్త నియామకాలు చేపట్టాలని వారు కోరుతున్నారు.
• భద్రతా లోపాలు: బ్యాంక్ బ్రాంచ్‌లలో ఆర్మ్‌డ్ గార్డ్స్ (తుపాకులు కలిగిన సెక్యూరిటీ గార్డ్స్) లేకపోవడంపై ఆందోళన వ్యక్తం చేస్తూ, గట్టి భద్రతా చర్యలు చేపట్టాలని డిమాండ్ చేస్తున్నారు.
• ఎన్‌పీఎస్ సమస్యలు: నేషనల్ పెన్షన్ సిస్టమ్ (NPS) కింద ఇతర పబ్లిక్ సెక్టార్ బ్యాంక్ ఉద్యోగులకు ఉన్నట్లుగా, తమకు నచ్చిన పెన్షన్ ఫండ్ మేనేజర్‌ను మార్చుకునే ఫ్లెక్సిబిలిటీ ఎస్బీఐ ఉద్యోగులకు లేదు. ఈ వివక్షను తొలగించాలని డిమాండ్ చేస్తున్నారు.
• జీతాల అసమానత: ఆఫీసర్ కేటగిరీ వారికి ప్రత్యేక అలవెన్సులు , శాలరీ బెనిఫిట్స్ ఇస్తూ, వర్క్‌మెన్ స్టాఫ్‌ను పక్కన పెట్టడంపై ఉద్యోగులు అభ్యంతరం వ్యక్తం చేస్తున్నారు.

కస్టమర్లు ఏమి చేయాలి?

ఈ సుదీర్ఘ బ్యాంక్ సెలవుల (Bank holidays) వల్ల లావాదేవీలు నిలిచిపోకుండా ఉండాలంటే.. కస్టమర్లు తమ ముఖ్యమైన పనులైన నగదు డిపాజిట్లు, పెద్ద మొత్తంలో విత్‌డ్రాయల్స్, చెక్కుల క్లియరెన్స్, పాస్‌బుక్ అప్‌డేట్లు, లోన్ డాక్యుమెంటేషన్ , అకౌంట్ వెరిఫికేషన్ వంటి పనులను మే 23 కంటే ముందే పూర్తి చేసుకోవాలని నిపుణులు సూచిస్తున్నారు.ఇకపోతే డిజిటల్ లావాదేవీలు యథాతథంగా జరుగుతాయి.