మహిళలకు ప్రత్యేక ఆఫర్, హోంలోన్‌పై వడ్డీ రేటు తగ్గింపు

అంతర్జాతీయ మహిళా దినోత్సవం సందర్భంగా స్టేట్ బ్యాంక్ ఆఫ్ ఇండియా (SBI) మహిళా రుణగ్రహీతలకు హోమ్ లోన్ వడ్డీ రేట్ల పైన తగ్గింపును ప్రకటించింది. వుమెన్స్ డే రోజున మహిళా రుణగ్రహీతలకు 5 బేసిస్ పాయింట్ల‌ అదనపు రాయితీని ఇచ్చింది. 6.70 శాతం నుంచి ప్రారంభం కానున్న‌ వ‌డ్డీ రేట్లపై ఇది వ‌ర్తిస్తుంది.

మార్చి 1వ తేదీన ఎస్బీఐ హోమ్ లోన్ పైన వడ్డీ రేటును తగ్గించింది. 6.70 శాతం నుంచి వడ్డీ రేట్లతో బ్యాంకు ఇప్పుడు 70 బేసిస్ పాయింట్ల వరకు వడ్డీ రాయితీ అందిస్తోంది. ఇది మార్చి 31వ తేదీతో ముగిసే పరిమిత కాల ప్రయోజనం మాత్రమే. ప్రాసెసింగ్ ఫీజును వంద శాతం రద్దు చేసింది. వడ్డీ రాయితీ రుణ మొత్తం, సిబిల్ స్కోరు పైన ఆధారపడి ఉంటుంది. మంచి క్రెడిట్ చ‌రిత్ర‌ ఉంటే కస్టమర్లకు మెరుగైన రేట్లు అందించ‌డం చాలా ముఖ్యమని ఎస్బీఐ పేర్కొంది.

ప్రభుత్వరంగ దిగ్గజం స్టేట్ బ్యాంక్ ఆఫ్ ఇండియా(SBI), ప్రయివేటురంగ బ్యాంకులు HDFC, ICICI, కొటక్ మహీంద్రా సహా వివిధ బ్యాంకులు ఇటీవల హోంలోన్ వడ్డీ రేట్లను భారీగా తగ్గించాయి. కొన్ని బ్యాంకులు ఈ వడ్డీ రేట్లను పది సంవత్సరాలు, 15 సంవత్సరాల కనిష్టానికి తగ్గించాయి. కరోనా నేపథ్యంలో ఆర్బీఐ ఏడాదికాలంగా రెపో రేటును తగ్గిస్తోంది. ఇందుకు అనుగుణంగా బ్యాంకులు కూడా వడ్డీ రేట్లు తగ్గిస్తున్నాయి. అయితే ఇటీవల ఆర్బీఐ వడ్డీ రేట్లు తగ్గించకపోయినప్పటికీ బ్యాంకులు మాత్రం దశాబ్దం కనిష్టానికి తగ్గించాయి. ఇప్పుడు ఎస్బీఐ మహిళలకు మహిళా దినోత్సవం రోజున ఆఫర్ ఇచ్చింది.