SBI News: సమయం లేదు ఇన్వెస్టర్స్.. ఎస్‌బీఐ పెట్టుబడిదారులకు చివరి ఛాన్స్..

SBI Amrit Kalash FD: మరికొద్ది రోజుల్లో వడ్డీ రేట్ల తగ్గింపులు ప్రపంచ వ్యాప్తంగా సెంట్రల్ బ్యాంకులు ప్రారంభించనున్నాయి. ఈ క్రమంలో పెట్టుబడిదారులు చివరి అవకాశాన్ని కోల్పోకుండా ఉండేందుకు స్టేట్ బ్యాంక్ ఆఫ్ ఇండియా ఒక సదవకాశం గడవును పొడిగించింది.

ప్రస్తుత అధిక వడ్డీ రేట్ల కాలం త్వరలో ముగియనున్న వేళ ఫిక్స్‌డ్ డిపాజిట్ పెట్టుబడిదారులకు అధిక వడ్డీని అందించే దారులు క్రమంగా మూసుకుపోనున్నాయి. అయితే ప్రభుత్వ యాజమాన్యంలోని స్టేట్ బ్యాంక్ ఆఫ్ ఇండియా తన అమృత్ కలాష్ FD పథకం పొడిగించటం ద్వారా పెట్టుబడిదారులకు చివరి అవకాశాన్ని ఇప్పటికీ తెరిచే ఉంచింది. వాస్తవానికి అమృత్ కలాష్ అనేది 400 రోజుల FD స్కీమ్, ఇందులో కస్టమర్‌లు గరిష్టంగా 7.60 శాతం వడ్డీని పొందుతారు. బ్యాంక్ ఈ పథకాన్ని మొదటిసారి ఏప్రిల్ 12, 2023న ప్రారంభించిన సంగతి తెలిసిందే. ఇప్పటికే అనేక సార్లు బ్యాంక్ స్కీమ్ గడువును పొడిగించింది.

అయితే ఆఖరిసారి పథకం గడువును సెప్టెంబర్ 30, 2024 వరకు పొడిగించింది. దీంతో పెట్టుబడిదారుల చూపు ఈ పెట్టుబడి స్కీమ్ పై కొనసాగుతోంది. 400 రోజులకు పెట్టుబడిపై సాధారణ కస్టమర్‌లు గరిష్టంగా 7.10 శాతం వడ్డీని, సీనియర్ సిటిజన్ కస్టమర్‌లు అదనంగా 50 బేసిస్ పాయింట్లు అంటే 7.60 శాతం వడ్డీని అమృత్ కలాష్ అందిస్తోంది. స్కీమ్ కింద ఇన్వెస్టర్లు గరిష్ఠంగా రూ.2 కోట్ల వరకు సొమ్మును డిపాజిట్ చేసేందుకు ప్రభుత్వ బ్యాంక్ సదవకాశాన్ని అందుబాటులో ఉంచింది.

ఇటీవలి కాలంలో రిజర్వు బ్యాంక్ దేశీయ బ్యాంకుల్లో తగ్గిన ఫిక్స్‌డ్ డిపాజిట్లపై ఆందోళన వ్యక్తం చేసిన తర్వాత అనేక బ్యాంకులు ఆకర్షనీయమైన వడ్డీ పథకాలను ఇన్వెస్టర్ల కోసం చేరువచేస్తున్న సంగతి తెలిసిందే. ఈ క్రమంలో ప్రత్యేక డిపాజిట్ స్కీమ్ కు సంబంధించిన వివరాలను తెలుసుకునేందుకు కస్టమర్లు తమకు సమీపంలోని బ్యాంక్ బ్రాంచిని సందర్శించవచ్చు. పథకం కింద డబ్బును దాచుకునేందుకు ఇన్వెస్టర్లు ఆధార్ కార్డ్, పాన్ కార్డ్, పాస్‌పోర్ట్ సైజ్ ఫోటో, మొబైల్ నంబర్, ఈ-మెయిల్ ఐడి వంటి వివరాలను అందించాల్సి ఉంటుంది.