Rocket Stock: తెలంగాణ కంపెనీలో మారిషస్ సంస్థ పెట్టుబడి.. పరుగులు తీస్తున్న స్టాక్.. మీ దగ్గర ఉందా..?

Rocket Stock: మారిషస్‌కు చెందిన విదేశీ ఇన్వెస్ట్‌మెంట్ ఏజెన్సీ ఎరిస్కా ఇన్వెస్ట్‌మెంట్ ఫండ్ కొత్తగా దేశీయ కంపెనీలో పెట్టుబడులు పెట్టింది. బీఎస్ఈలో లిస్ట్ అయిన స్మాల్ క్యాప్ కంపెనీ అయిన సాంప్రే న్యూట్రిషన్స్ లిమిటెడ్‌లో వాటాలను కొనుగోలు చేసింది. ఈ క్రమంలో 50,000 షేర్లను FII 15 సెప్టెంబర్ 2022న బల్క్ డీల్‌లో కొనుగోలు చేసింది.

కొనుగోలు ధర ఇలా..

విదేశీ సంస్థ కంపెనీలో 50,000 షేర్లను రూ.101 ధరకు కొనుగోలు చేసింది. ప్రస్తుత మార్కెట్ క్యాప్ దాదాపు రూ.52 కోట్లు ఉన్న కంపెనీలో.. మారిషస్‌ సంస్థ రూ.50.50 లక్షలు ఇన్వెస్ట్ చేసింది. ఈ వార్తల నేపథ్యంలో స్టాక్ అప్పర్ సర్క్యూట్ తాకింది. ఈ రోజు మధ్యాహ్నం 12 గంటల సమయంలో Sampre Nutritions Ltd షేర్ ధర రూ.112.55గా ఉంది.

షేర్ ధర చరిత్ర..

ఈ మైక్రో-క్యాప్ స్టాక్ 2022లో వచ్చిన మల్టీబ్యాగర్ స్టాక్‌లలో ఒకటిగా ఉంది. ఏడాది కిందట స్టాక్ ధర రూ. 33గా ఉంది. ఈ రోజు షేర్ 5 శాతం పెరిగిన తర్వాత రూ.112.55గా ఉంది. ఈ కాలంలో షేర్ 225 శాతానికి పైగా రాబడిని అందించింది. ఈ మల్టీబ్యాగర్ స్టాక్ గత సంవత్సరంలో దాదాపు రూ.17 నుంచి రూ.107.40కి పెరిగింది. ఈ కాలంలో దాని పెట్టుబడిదారులకు 550 శాతం రాబడిని ఇచ్చింది.

షేర్ బుక్ వ్యాల్యూ..

2022 నాటికి ఈ మల్టీబ్యాగర్ స్టాక్ పుస్తక విలువ ఒక్కో షేరుకు దాదాపు 23గా ఉంది. మల్టీబ్యాగర్ స్టాక్ ఈ రోజు దాని కొత్త జీవితకాల గరిష్ఠ స్థాయి అయిన రూ.112.55ని తాకింది. ప్రస్తుతం దీని 52 వారాల కనిష్ఠ ధర రూ.15.25గా ఉంది. ప్రస్తుతం కంపెనీ మార్కెట్ క్యాప్ రూ.54.25 కోట్లను చేరుకుంది.

కంపెనీ వ్యాపారం..

తెలంగాణ కేంద్రంగా కంపెనీ తన తయారీ యూనిట్ నిర్వహిస్తోంది. గత 20 సంవత్సరాలుగా కంపెనీ వ్యాపారంలో ఉంది. కంపెనీ కన్ఫెక్షనరీ, చాక్లెట్స్ వంటి ఉత్పత్తులను తయారు చేస్తోంది. కంపెనీ ప్రపంచంలోని ప్రఖ్యాత కంపెనీలైన నెస్లే, క్యాడ్బరీ, హిమాలయ వంటి కంపెనీల కోసం వివిధ ఉత్పత్తులను తయారు చేస్తోంది.