Layoffs News: దిగ్గజ టెక్ కంపెనీలో మరోసారి లేఆఫ్స్.. గతేడాది 8 వేల మంది, మరి ఇప్పుడు..

Salesforce: దిగ్గజ కంపెనీల లేఆఫ్స్‌తో ప్రారంభమైన కొత్త ఏడాది అదే పంథాలో కొనసాగుతోంది. లక్షలాది మంది ఇప్పటికే కొలువులు కోల్పోయి దిక్కుతోచని స్థితిలో ఉండగా.. మరిన్ని లేఆఫ్స్‌ ఇచ్చేందుకు ఆయా కంపెనీలు వెనకాడటం లేదు.

క్లౌడ్ ఆధారిత కస్టమర్ రిలేషన్ షిప్ మేనేజ్‌మెంట్ సాఫ్ట్‌వేర్ దిగ్గజం సేల్స్‌ఫోర్స్ ఈసారి లేఆఫ్స్ ప్రకటించింది. కంపెనీ వ్యాప్తంగా ఉన్న సుమారు 700 మంది ఉద్యోగులను తొలగించేందుకు సిద్ధమైంది. మొత్తం 70 వేల మంది సిబ్బందిలో 1 శాతానికి ఉద్వాసన పలకాలని భావిస్తున్నట్లు ప్రముఖ మీడియా సంస్థ నివేదించింది.

ఏడాది క్రితం కూడా ఇలాగే ఏకంగా 10 శాతం మంది ఉద్యోగులపై సేల్స్‌ఫోర్స్ వేటు వేసింది. దాదాపు 8 వేల మంది సిబ్బంది కొలువు పోగొట్టుకున్నారు. ఖర్చులను తగ్గించాలనే పెట్టుబడిదారుల ఒత్తిడికి తలొగ్గక తప్పనిసరి పరిస్థితుల్లో అలా చేయాల్సి వచ్చింది. అయితే తాజా నిర్ణయం వల్ల కోతలు తక్కువే కావడంతో.. ఇది సాధారణ సర్దుబాటు కావచ్చని నివేదిక పేర్కొంది.

గతేడాది కంపెనీ పలు సవాళ్లను ఎదుర్కొంది. కరోనా విజృంభణ అనంతరం విక్రయాలు మందగించడం దాని వృద్ధిని ప్రభావితం చేసింది. ఇలియట్ మేనేజ్‌మెంట్ వంటి క్రియాశీల పెట్టుబడిదారులు సంస్థలో వాటాలను కొనుగోలు చేశారు. మార్జిన్ విస్తరణను వేగవంతం చేయాలని CEO మార్క్ బెనియోఫ్‌ను కోరారు. వీటిని నెరవేర్చడానికి ఉద్యోగాల కోతలతో పాటు రియల్ ఎస్టేట్ హోల్డింగ్‌ను తగ్గించాల్సి వచ్చింది. కాగా మరోసారి కోతలకు సిద్ధమైంది.