భారత ఆర్థిక వ్యవస్థపై S&P గ్లోబల్ షాకింగ్ రిపోర్ట్.. మరో మూడేళ్లపాటు అంచనాలు ఎలా ఉన్నాయంటే..

Economy: అంతర్జాతీయ అనిశ్చితిలోనూ భారత ఆర్థిక వ్యవస్థ మెరుగైన పనీతీరు కనబరుస్తోంది. 2030 నాటికి ప్రపంచంలోని మూడవ అతిపెద్ద ఎకానమీగా అవతరించనుందని అంచనాలు ఉన్నాయి. అయితే ఈ సమయంలో ఇండియాపై ప్రముఖ రేటింగ్ సంస్థ S&P చేసిన వ్యాఖ్యలు కొంత నిరుత్సాహాన్ని కలిగిస్తున్నట్లు తెలుస్తోంది.

'కరోనా వ్యాప్తికి ముందటితో పోలిస్తే మరో మూడేళ్లలో ఇండియన్ పబ్లిక్ ఫైనాన్స్ అంతగా మెరుగుపడే అవకాశం లేదు. సాధారణ ప్రభుత్వ లోటు మరియు అప్పులు 7-8 శాతం మధ్య ఉండవచ్చు' అని S&P గ్లోబల్ సీనియర్ డైరెక్టర్ ఫర్ APAC సావరిన్ రేటింగ్ కిమ్ ఎంగ్ టాన్ అంచనా వేశారు.

ఇండియా రుణాలు చాలా ఎక్కువ స్థాయిలో ఉండటంతో.. భారత్ క్రెడిట్ ప్రొఫైల్‌ లో ఈ పెరామీటర్ అత్యంత బలహీనంగా ఉందని టాన్ తెలిపారు. అయితే స్థిరమైన దృక్పథంతో BBB- రేటింగ్ ఇచ్చినట్లు చెప్పారు. అయితే దీనిని మెరుగుపరచుకునేందుకు ప్రభుత్వం తీవ్రంగా ప్రయత్నిస్తోంది. 2020-21 నాటికి GDPలో 9.2 శాతానికి పెరిగిన ద్రవ్య లోటును 2025-26 నాటికి 4.5 శాతం దిగువకు తీసుకురావాలని చూస్తోంది.

రిజర్వ్ బ్యాంక్ ఆఫ్ ఇండియా (RBI) ముందస్తు సర్వే ప్రకారం.. కేంద్రం మరియు రాష్ట్రాల సంయుక్త ద్రవ్య లోటు ఈ ఏడాది GDPలో 8.7 శాతం, 2024-25లో 8.3 శాతంగా ఉండనుంది. ఇక 2022లో GDPలో 81 శాతం ఉన్న సాధారణ ప్రభుత్వ రుణం 2023లో 81.9, 2024లో 82.3 శాతానికి పెరుగుతుందని అంతర్జాతీయ ద్రవ్యనిధి అంచనా వేసింది. కానీ 2028లో క్రమంగా 80.5కు తగ్గుతుందని వెల్లడించింది.