Russia: పుతిన్ సంతకంతో వెస్ట్రన్ కంట్రీస్ షేక్.. బ్లాక్ చేసిన ఆస్తుల రిలీజ్‌కు మాస్టర్ ప్లాన్

Russia: ఉక్రెయిన్‌ తో యుద్ధంపై రష్యాను తప్పుపడుతూ ఆయా దేశాలు పలు ఆంక్షలు విధించాయి. వివిధ ప్రాంతాల్లోని రష్యన్ల ఆస్తులను స్తంభింపచేశాయి. అయితే రష్యా అధినేత వ్లాదిమిర్ పుతిన్.. వెస్ట్రన్ దేశాలకు గట్టి షాక్ ఇచ్చారు. ఈ అనూహ్య నిర్ణయంతో అమెరికా దాని మిత్ర దేశాల మైండ్ బ్లాక్ అయినట్లయింది.

రష్యన్ల ఆస్తులను వెస్ట్రన్ దేశాలు స్తంభింపచేయడంతో దానికి కౌంటర్‌ గా ఆయా దేశాలకు చెందిన ఇన్వెస్టర్ల సంపదను మాస్కో బ్లాక్ చేసింది. అయితే ఇప్పుడు తాజాగా రష్యా అధ్యక్షుడు పుతిన్ ఓ డిక్రీపై సంతకం చేశారు. దీనిద్వారా రష్యాలో స్తంభింపజేసిన నిధులతో విదేశీ ఇన్వెస్టర్లు ఆయా దేశాల్లో ఉన్న రష్యన్ల ఆస్తులను కొనుగోలు చేసే అవకాశం లభిస్తుంది.

యుద్ధం కారణంగా పశ్చిమ దేశాలు రష్యాపై పలు ఆంక్షలు విధించాయి. ఫలితంగా 3.5 మిలియన్లకు పైగా రష్యన్ల సంపద విదేశాల్లో బ్లాక్ అయింది. వీటి విలువ దాదాపు 1.5 ట్రిలియన్ రూబిల్స్ (16.3 బిలియన్ డాలర్లు)గా ఉండవచ్చని అంచనా. ప్రస్తుతం వీటి విడుదలకు పుతిన్ ప్రభుత్వం సీరియస్‌ గా దృష్టి సారించడంతో తాజా ఆదేశాలు జారీ చేయబడినట్లు తెలుస్తోంది.

డిక్రీ ప్రకారం.. ప్రత్యేక 'టైప్-సి' ఖాతాల నుంచి నిధులను ఉపయోగించి విదేశాలలో స్తంభింపచేసిన సెక్యూరిటీలను కొనుగోలు చేయవచ్చు. అయితే 'అన్‌ ఫ్రెండ్లీ' దేశాల పౌరులు మాత్రమే ఇలా చేసేందుకు రష్యా అనుమతిస్తుంది. మొదటి దశలో సుమారు 100 బిలియన్ రూబిల్స్ విలువైన ఖాతాలను అన్‌బ్లాక్ చేయాలని యోచిస్తోంది.