భారీగా పతనమైన రూపాయి, డాలర్‌తో 75 రికార్డ్‌కు.. కారణాలివే

కరోనా వైరస్, క్రూడాయిల్ ప్రైస్ యుద్ధం వంటి అంతర్జాతీయ పరిణామాలతో రూపాయి బలహీనపడుతోంది. గురువారం డాలర్ మారకంతో 70 పైసలకు పైగా క్షీణించి రూ.74.96 వద్ద ట్రేడ్ అయింది. అంతకుముందు ఉదయం రూ.74.95 వద్ద ట్రేడింగ్ ప్రారంభించింది. క్రితం ముగింపు రూ.74.26గా ఉంది. అంటే గురువారం దాదాపు రూ.75ను టచ్ అయింది.

ఫారన్ పోర్ట్‌పోలియేఇన్వెస్టర్లు ఇండియన్ మార్కెట్ల నుండి పెద్ద ఎత్తున పెట్టుబడులు వెనక్కి తీసుకుంటున్నారు. కరోనా భయాలతో FPIలు వెనక్కి వెళ్ళడం రూపాయి బలహీనానికి ముఖ్య కారణాల్లో ఒకటి. మార్చి నెలలో ఇప్పటి వరకు రూ.70,000 కోట్ల పెట్టుబడులు వెనక్కి వెళ్లాయి. ఓవర్సీస్ ఇన్వెసట్టర్లు ఈక్విటీల నుండి రూ.36,200 కోట్లు, డెట్ సెగ్మెంట్ నుండి రూ.32,000 కోట్లు వెనక్కి తీసుకున్నారు.

మార్కెట్లు కూడా భారీ నష్టాల్లో ఉన్న విషయం తెలిసిందే. ఐటీ ఇండెక్స్ 27 నెలల కనిష్టానికి చేరుకుంది. మరోవైపు, గురువారం చమురు ధరలు కూడా 20 శాతం లాభపడ్డాయి. ఉదయం భారీ నష్టాల్లో ప్రారంభమైన మార్కెట్లు ఆ తర్వాత మధ్యాహ్నానికి కాస్త కుదురుకున్నాయి. సెన్సెక్స్ 1700 పాయింట్ల నష్టంతో ప్రారంభమైంది. ఆ తర్వాత 700 పాయింట్లు కుదురుకొని 1000 పాయింట్ల నష్టం వద్ద కొనసాగింది. కరోనా, అంతర్జాతీయ పరిణామాలతో మార్కెట్లు ఊగిసలాటలో ఉన్నాయి.