SBI: రూ. 5,740 కోట్ల డివిడెండ్‌ను ప్రభుత్వానికి అందించిన ఎస్బీఐ

స్టేట్ బ్యాంక్ ఆఫ్ ఇండియా (SBI) 2022-23 ఆర్థిక సంవత్సరానికి రూ. 5,740 కోట్ల డివిడెండ్‌ను ప్రభుత్వానికి చెల్లించింది. ఇది భారత ప్రభుత్వానికి బ్యాంక్ ఇచ్చిన అత్యధిక డివిడెండ్. డివిడెండ్ చెక్కును ఆర్థిక సేవల కార్యదర్శి వివేక్ జోషి సమక్షంలో ఆర్థిక మంత్రి నిర్మలా సీతారామన్‌కు ఎస్‌బిఐ ఛైర్మన్ దినేష్ కుమార్ ఖరా అందించారు.

మార్చి 31, 2023తో ముగిసిన ఆర్థిక సంవత్సరానికి SBI ప్రతి ఈక్విటీ షేర్‌కు (1,130 శాతం) రూ. 11.30 డివిడెండ్ ప్రకటించింది. దేశంలోని అతిపెద్ద ప్రభుత్వ రంగ బ్యాంకు ఎస్‌బీఐ కూడా గత ఆర్థిక సంవత్సరంలో ప్రభుత్వానికి పన్ను కింద రూ.17,648.67 కోట్లు ఇచ్చింది. ఆర్థిక సంవత్సరం నాల్గవ త్రైమాసికంలో, SBI 16,695 కోట్ల స్టాండ్‌లోన్ నికర లాభాన్ని నివేదించింది. ఇది గత సంవత్సరం ఇదే త్రైమాసికంతో పోలిస్తే 83 శాతం వృద్ధిని సాధించింది.

జనవరి-మార్చి కాలంలో ఎస్‌బిఐ నిరర్థక ఆస్తుల (ఎన్‌పిఎ) కేటాయింపులు కూడా గణనీయంగా తగ్గి రూ.1,278 కోట్లకు చేరాయి. పూర్తి 2022-23 ఆర్థిక సంవత్సరానికి, SBI నికర లాభం 59 శాతం పెరిగి రూ. 50,232.45 కోట్లకు చేరుకుంది, ఇది గత ఆర్థిక సంవత్సరంలో రూ. 31,675.98 కోట్లుగా ఉంది.

ఒక నివేదిక ప్రకారం గత ఆర్థిక సంవత్సరంలో (2022-23)లో ప్రభుత్వ రంగ బ్యాంకులు అంటే PSB ల లాభం ఏకంగా లక్ష కోట్ల రూపాయలు దాటింది. ఇందులో దాదాపు సగం వాటా దేశంలోని అతిపెద్ద బ్యాంకు ఎస్‌బీఐదే ఉంది. అంటే 11 ఇతర ప్రభుత్వ రంగ బ్యాంకులు కలిపి ఆర్జించిన లాభం ఒక్క స్టేట్ బ్యాంక్ ఆఫ్ ఇండియా ఆర్జించిన దానితో సమానంగా ఉంది.