Click it and Unblock the Notifications
రూ.45 లక్షల జీతం వచ్చినా నెలాఖరుకు ఏమీ మిగలడం లేదు.. నా డబ్బు ఎక్కడికి వెళ్తోందంటూ రోదిస్తున్న బెంగళూరు టెకీ
బెంగళూరుకు చెందిన ఒక సాఫ్ట్వేర్ కన్సల్టెంట్కు సంబంధించిన పాత ఇంటర్వ్యూ క్లిప్ సోషల్ మీడియా ప్లాట్ఫామ్ X లో మళ్లీ ప్రత్యక్షమవ్వడంతో, మెట్రో నగరాల్లోని జీతాలు, విలాసవంతమైన జీవనశైలి, వ్యక్తిగత ఆర్థిక ప్రణాళికలపై నెటిజన్ల మధ్య ఒక ఆసక్తికరమైన చర్చ మొదలైంది. యూట్యూబ్లో మ్యూచువల్ ఫండ్ సలహాదారు అన్షుమాన్ శర్మ నిర్వహించిన ఈ ఇంటర్వ్యూలో.. గత 14 ఏళ్లుగా బెంగళూరులో నివసిస్తున్న సూర్య అనే సాఫ్ట్వేర్ కన్సల్టెంట్ తన నెలవారీ ఆదాయం, కుటుంబ ఖర్చులు, పొదుపు చేయడంలో తను ఎదుర్కొంటున్న సవాళ్లను పంచుకున్నారు.
వార్షికంగా 45 లక్షల రూపాయల భారీ ప్యాకేజీని సంపాదిస్తూ.. అన్ని పన్నులు పోను ప్రతి నెలా దాదాపు 2.45 లక్షల రూపాయల నికర ఆదాయాన్ని ఇంటికి తీసుకువెళ్తున్నప్పటికీ, నెలాఖరు వచ్చేసరికి తన బ్యాంక్ ఖాతాలో ఏమీ మిగలడం లేదని Bengaluru Techi అంగీకరించడం ఆన్లైన్ వేదికలపై పెద్ద చర్చకు దారితీసింది. ముఖ్యంగా వివాహం చేసుకుని, ఒక బిడ్డకు తండ్రి అయిన తర్వాత పెరిగిన కుటుంబ బాధ్యతల వల్ల తన సిస్టమాటిక్ ఇన్వెస్ట్మెంట్ ప్లాన్స్ (SIP) లను అనుకున్న స్థాయిలో పెంచలేకపోతున్నానని ఆయన వివరించారు.
ఆయన పంచుకున్న నెలవారీ ఖర్చుల వివరాలను పరిశీలిస్తే.. అత్యధిక భాగం గృహ రుణ ఈఎంఐ (EMI) ల రూపంలో 63,000 రూపాయల మేర వెళ్తోంది. అయితే ఈ మొత్తం ఆయన నెలవారీ ఆదాయంలో 30 శాతం కంటే తక్కువగానే ఉన్నందున, ఇది ఆర్థిక నియమాల ప్రకారం మంచి పరిమితిలోనే ఉందని నిపుణులు పేర్కొన్నారు. ఈ గృహ రుణం కాకుండా, తన కుమారుడి పాఠశాల ఫీజుల కోసం ప్రతి నెలా 11,000 రూపాయలు, ఇళ్లకు సంబంధించిన ఆహారం మరియు కిరాణా సామాగ్రి కోసం 12,000 రూపాయలు ఖర్చు చేస్తున్నారు.
వీటికి తోడు ఇతర నిత్యావసరాలు, వివిధ రకాల ఖర్చుల కింద మరో 20,000 రూపాయలు అవుతున్నాయి. అయితే సోషల్ మీడియాలో అత్యధికంగా చర్చకు దారితీసిన అంశం ఏమిటంటే, ఆయన షాపింగ్, ప్రయాణాలు (ట్రిప్స్), మరియు బయట హోటళ్లలో భోజనం చేయడం వంటి వినోదాల కోసమే ప్రతి నెలా సుమారు 32,000 రూపాయల భారీ మొత్తాన్ని వెచ్చిస్తున్నట్లు వెల్లడించడం.
ఈ ఖర్చుల శైలిని చూసిన నెటిజన్లు X లో రెండు భిన్నమైన అభిప్రాయాలతో స్పందించారు. ఒక వర్గం వారు దీనిని పేలవమైన ఆర్థిక ప్రణాళికగా అభివర్ణించారు. సంపాదన పెరిగే కొద్దీ ఖర్చులు పెంచుకుంటూ పోయే 'జీవనశైలి ద్రవ్యోల్బణం' (Lifestyle Inflation) లో ఆయన చిక్కుకున్నారని, ఎవరైనా సరే ముందుగా గృహ రుణం, ఆహారం, చదువు వంటి ప్రాథమిక అవసరాలను, తమకు కావలసినంత పొదుపు మొత్తాన్ని పక్కన పెట్టుకున్నాకే మిగిలిన డబ్బును విలాసాల కోసం ఖర్చు చేయాలని సలహా ఇచ్చారు.
అయితే దీనికి పూర్తి భిన్నంగా స్పందించిన మరో వర్గం వారు, ఇందులో ఎలాంటి తప్పు లేదని సూర్యకు మద్దతుగా నిలిచారు. గృహ రుణం చెల్లించడం కూడా ఒక రకమైన ఆస్తి సృష్టి (పొదుపు) కిందకే వస్తుందని, అన్నీ పోను ఆయన తన తల్లిదండ్రులను, అమ్మమ్మను మరియు కుటుంబాన్ని చక్కగా చూసుకుంటూనే ఇంకా 25 శాతానికి పైగా ఆదాయాన్ని ఆదా చేయగలుగుతున్నారని గుర్తుచేశారు. ఒక వ్యక్తి అంతగా సంపాదిస్తున్నప్పుడు తన పిల్లలకు మంచి విద్యను అందిస్తూ, కుటుంబంతో కలిసి సరదాగా గడపడానికి డబ్బు ఖర్చు చేయడంలో ఎలాంటి తప్పులేదని వారు సమర్థించారు.
Sign in with Google