రిలయన్స్, ముఖేష్ అంబానీలకు షాక్: సెబి రూ.40 కోట్ల జరిమానా

రిలయన్స్ ఇండస్ట్రీస్ లిమిటెడ్, ఆ సంస్థ అధినేత ముఖేష్ అంబానీకి మార్కెట్ నియంత్రణ సంస్థ సెబీ షాకిచ్చింది. 2007లో రిలయన్స్ పెట్రోలియం షేర్ల అక్రమ లావాదేవీలకు సంబంధించి రూ.40 కోట్ల జరిమానా విధించింది. ఇందులో రూ.15 కోట్లు అంబానీ చెల్లించాలని ఆదేశాలు జారీ చేసింది. రిలయన్స్ రూ.25 కోట్లు చెల్లించాలి.

దీనికి తోడు నగదు, ఎఫ్ అండ్ ఓ విభాగంలో ఈ షేర్ల అక్రమ లావాదేవీలకు తోడ్పాడును అందించిన నేవీ ముంబై సెజ్‌కు రూ.20 కోట్లు, ముంబై సెజ్ కంపెనీకి రూ.10 కోట్ల జరిమానా విధించింది. ఈ మేరకు సెబి విచారణ అధికారి బీజే దిలీప్ శుక్రవారం ఆదేశాలు జారీ చేశారు.

95 పేజీల ఆర్డర్‌లో సెబీ అడ్జెటికేటింగ్ అధికారి బీజే దిలీప్ ఆదేశాలు జారీ చేశారు. ఆర్పీఎల్ షేర్ ధరల మ్యానిప్యులేషన్ ద్వారా పైన జరిమానా విధించబడిన పార్టీలు అక్రమంగా ఆర్జించినట్లు సెబీ అభిప్రాయపడింది.