నిన్ను భవిష్యత్తులో కాపాడేది ఈ రెండు మాత్రమే.. త్వరగా మేలుకోవాలంటున్న రాబర్ట్ కియోసాకి..

ప్రపంచవ్యాప్తంగా మిలియన్ల మంది పాఠకులను ఆకట్టుకున్న ప్రముఖ ఆర్థిక పుస్తకం రిచ్ డాడ్, పూర్ డాడ్ రచయిత రాబర్ట్ కియోసాకి.. తన జీవితాన్ని, ఆలోచనా విధానాన్ని పూర్తిగా మార్చివేసిన ఒక కీలకమైన కాలాన్ని ఇటీవల పంచుకున్నారు. తన గురువు, ప్రపంచ ప్రఖ్యాత వాస్తుశిల్పి, వ్యవస్థల సిద్ధాంతవేత్త, జియోడెసిక్ డోమ్ ఆవిష్కర్త అయిన ఆర్. బక్మిన్‌స్టర్ ఫుల్లర్ అందించిన తత్వశాస్త్రాన్ని ఆయన గుర్తు చేసుకున్నారు.

ఫుల్లర్ ఆలోచనలను ప్రస్తుత డిజిటల్ యుగానికి అనుసంధానిస్తూ.. వేగంగా మారుతున్న ఆర్టిఫిషియల్ ఇంటెలిజెన్స్ (AI), బిట్‌కాయిన్ సాంకేతికతలు ప్రపంచ సంపదను, ఉద్యోగ వ్యవస్థలను ఏ విధంగా ప్రభావితం చేయబోతున్నాయో కియోసాకి సుదీర్ఘంగా విశ్లేషించారు. తన జీవిత గమనాన్ని తీర్చిదిద్దడంలో ఫుల్లర్ కీలక పాత్ర పోషించారని కియోసాకి చెప్పారు. తాను వరుసగా మూడు వేసవికాలాలు ఫుల్లర్ వద్ద చదువుకున్నానని తెలిపారు. ఫుల్లర్‌ను కలవడానికి ముందు, కియోసాకి రాళ్ల వ్యాపారం చేసే ఒక సంస్థలో పనిచేసేవారు. ఆ వ్యాపారం బాగానే నడుస్తున్నప్పటికీ, కేవలం డబ్బు సంపాదించడం తప్ప దానికి వేరే గొప్ప ప్రయోజనం ఏమీ లేదని ఆయనకు అనిపించింది.

ఫుల్లర్‌తో గడిపిన కాలం అతని దృక్పథాన్ని పూర్తిగా మార్చివేసింది. తక్కువ వనరులతో ఎక్కువ సాధించడం ఎలాగో.. మానవులు కేవలం తమకోసమే జీవించకుండా ఇతరులకు సేవ చేయడం ద్వారా సమాజానికి ఎలా ఉపయోగపడాలో ఫుల్లర్ బోధించారు. ఈ తత్వశాస్త్రమే తదనంతరం కియోసాకి ఆర్థిక విద్యా రంగంలో కృషి చేయడానికి, రిచ్ డాడ్ సిరీస్ పుస్తకాలు రాయడానికి బలమైన పునాదిగా నిలిచింది. ఫుల్లర్ 1983లోనే మరణించినప్పటికీ.. భవిష్యత్తులో సాంకేతిక పరిజ్ఞానం సమాజాన్ని, ఆర్థిక వ్యవస్థను ఎలా మార్చబోతోందో ఆనాడే ఊహించారని.. ఆయన ఆలోచనా సరళి నేటి క్రిప్టో, ఏఐ విప్లవానికి ఖచ్చితంగా సరిపోలుతుందని కియోసాకి వ్యాఖ్యానించారు.

Also Read

యుద్ధం సమయంలో ఈ రెండు రంగాల్లో పెట్టుబడులు పెట్టండి.. కీలక సూచన చేస్తున్న రాబర్ట్ కియోసాకి..

ఇక డిజిటల్ కరెన్సీ అయిన బిట్‌కాయిన్‌పై కియోసాకి తీవ్రమైన విశ్వాసాన్ని వ్యక్తం చేశారు. అమెరికా ప్రభుత్వం అనియంత్రితంగా ముద్రిస్తున్న ద్రవ్య సరఫరా, రోజురోజుకూ నింగినంటుతున్న జాతీయ అప్పుల నుండి ఇన్వెస్టర్లను కాపాడే ఒక ప్రధాన సాంకేతిక రక్షణ కవచంగా బిట్‌కాయిన్ పనిచేస్తుందని ఆయన స్పష్టం చేశారు. తాను 2012 నుంచే బిట్‌కాయిన్‌లో నిరంతరాయంగా పెట్టుబడులు పెడుతున్నానని వెల్లడించారు.

అక్టోబర్ 2025లో నమోదైన $126,000 ఆల్-టైమ్ రికార్డు గరిష్ఠ స్థాయి నుండి ప్రస్తుతం బిట్‌కాయిన్ ధర సుమారు 50 శాతం తగ్గి $62,773 వద్ద ట్రేడ్ అవుతున్నప్పటికీ, దానిపై తనకున్న నమ్మకం సడలలేదని చెప్పారు. రాబోయే కాలంలో బిట్‌కాయిన్ ధర ఏకంగా $750,000 (సుమారు 7.5 లక్షల డాలర్లు) స్థాయికి చేరుకుంటుందని ఆయన ధీమా వ్యక్తం చేశారు. అదే సమయంలో, ఆర్టిఫిషియల్ ఇంటెలిజెన్స్ (AI) తెస్తున్న విప్లవాత్మక మార్పులపై కూడా కియోసాకి స్పష్టమైన హెచ్చరికలు జారీ చేశారు. ఏఐ రంగంలోకి వచ్చిపడుతున్న భారీ పెట్టుబడులు కొత్త తరహా సంపదను, ఆస్తులను సృష్టిస్తున్న మాట వాస్తవమే అయినప్పటికీ, అది సంప్రదాయ ఉద్యోగాలకు తీవ్రమైన ముప్పుగా పరిణమిస్తుందని ఆయన హెచ్చరించారు.

ఒక వ్యక్తి గనుక కేవలం సాధారణ ఉద్యోగిలా ఆలోచిస్తే.. సమీప భవిష్యత్తులోనే ఏఐ సాంకేతికత వారి స్థానాన్ని సులభంగా భర్తీ చేస్తుందని స్పష్టం చేశారు. అయితే, ఒక వ్యవస్థాపకుడిలా (Entrepreneur) ఆలోచించే వ్యక్తి ఈ ఏఐ సాంకేతికతను భయపడకుండా.. తన పనివేగాన్ని, ఆదాయ మార్గాలను పెంచుకోవడానికి ఒక శక్తివంతమైన సాధనంగా ఉపయోగించుకోగలడని ఆయన సూచించారు. AI లో పెరుగుతున్న పెట్టుబడులు, డేటా సెంటర్ల రుణాలు, బిట్‌కాయిన్ వంటి పరిమిత డిజిటల్ ఆస్తుల వైపు మళ్లుతున్న మూలధనం మధ్య సంబంధం ఉందనే చర్చ మార్కెట్ నిపుణులలో నడుస్తున్నప్పటికీ, బిట్‌కాయిన్ భవిష్యత్తుపై కియోసాకి చేసిన వ్యాఖ్యలు ప్రపంచవ్యాప్తంగా ఉన్న ఇన్వెస్టర్లలో, సాంకేతిక వర్గాలలో కొత్త ఉత్సాహాన్ని నింపాయి.