Bitcoin: అందరూ అమ్ముతుంటే.. నేను మాత్రం కొంటున్నా! బిట్‌కాయిన్‌పై రాబర్ట్ కియోసాకి కీలక ప్రకటన!

ప్రపంచ ప్రసిద్ధ ఆర్థిక నిపుణుడు, 'రిచ్ డాడ్ పూర్ డాడ్' (Rich Dad Poor Dad) పుస్తక రచయిత రాబర్ట్ కియోసాకి మరోసారి సంచలన వ్యాఖ్యలు చేశారు. ప్రపంచ స్టాక్ మార్కెట్లలో చరిత్రలోనే అతిపెద్ద పతనం (Stock Market Crash) అతి త్వరలోనే రాబోతోందని ఆయన హెచ్చరించారు. అయితే ఈ పతనం సామాన్యులకు ఒక పీడకలలా అనిపించినా, సరైన ప్రణాళిక ఉన్న ఇన్వెస్టర్లకు మాత్రం ఇది అపారమైన సంపదను సృష్టించే గొప్ప అవకాశం అని ఆయన అభిప్రాయపడ్డారు. ముఖ్యంగా తాను మాత్రం బిట్ కాయిన్ (Bitcoin) కొనుగోలును మరింత వేగవంతం చేస్తున్నానని ప్రకటించి అందరినీ ఆశ్చర్యపరిచారు.

2013 నాటి జోస్యం నిజం కాబోతోందా?

రాబర్ట్ కియోసాకి తన 'రిచ్ డాడ్స్ ప్రొఫెసీ' (Rich Dad's Prophecy) అనే పుస్తకంలో చాలా ఏళ్ల క్రితమే ఈ మార్కెట్ పతనం గురించి హెచ్చరించారు. ఇప్పుడు అదే జరగబోతోందని ఆయన సోషల్ మీడియా వేదికగా గుర్తు చేశారు. "చరిత్రలోనే అతిపెద్ద క్రాష్ చాలా దగ్గరలో ఉంది. ఎవరైతే నా హెచ్చరికలను పాటించి ముందుగానే సిద్ధమయ్యారో.. వారు తమ ఊహకు అందనంత ధనవంతులు అవుతారు. కానీ సిద్ధంగా లేని వారికి మాత్రం ఇది ఒక భయంకరమైన పీడకలగా మారుతుంది" అని ఆయన పేర్కొన్నారు.

పతనాన్ని ఒక 'సేల్' లా చూడండి!

చాలా మంది మార్కెట్ పడిపోతుంటే భయపడి తమ దగ్గర ఉన్న షేర్లను లేదా ఆస్తులను అమ్మేస్తుంటారు. కానీ కియోసాకి దృష్టిలో మార్కెట్ పతనం అంటే ఒక 'డిస్కౌంట్ సేల్'. షాపింగ్ మాల్స్‌లో వస్తువులు తక్కువ ధరకు దొరికినప్పుడు ఎలాగైతే ఎగబడి కొంటామో, మార్కెట్ క్రాష్ అయినప్పుడు విలువైన ఆస్తులు కూడా తక్కువ ధరకు దొరుకుతాయని, అప్పుడు కొనుగోలు చేసేవాడే అసలైన ధనవంతుడు అవుతాడని ఆయన వివరించారు.

బిట్‌కాయిన్‌పై కియోసాకి ఎందుకింత నమ్మకంగా ఉన్నారు?

రాబర్ట్ కియోసాకి తన పెట్టుబడి వ్యూహాన్ని వివరిస్తూ.. తాను ఫిజికల్ గోల్డ్ (బంగారం), సిల్వర్ (వెండి), ఎథీరియం , ముఖ్యంగా బిట్ కాయిన్ (Bitcoin) లో ఇన్వెస్ట్ చేస్తున్నట్లు తెలిపారు. "నేను బిట్‌కాయిన్ గురించి చాలా ధీమాగా ఉన్నాను. అందుకే ధర తగ్గిన ప్రతిసారీ నేను మరిన్ని కాయిన్లను కొంటున్నాను" అని ఆయన చెప్పారు. దీనికి ఆయన ఒక ప్రధాన కారణాన్ని కూడా వివరించారు. ప్రపంచంలో బిట్‌కాయిన్‌ ల సరఫరా కేవలం 21 మిలియన్లకే పరిమితం. ఇప్పటికే దాదాపు 21 మిలియన్లు చలామణిలోకి వచ్చేశాయి. పరిమితమైన సరఫరా ఉండి, డిమాండ్ పెరిగితే దాని విలువ ఆకాశాన్ని తాకుతుందని ఆయన నమ్ముతున్నారు.

ఇన్వెస్టర్లకు కియోసాకి సలహా

"నకిలీ బంగారం లేదా నకిలీ ఆస్తుల జోలికి వెళ్లకండి. నిజమైన విలువ ఉన్న వాటిపై పెట్టుబడి పెట్టండి" అని ఆయన సూచించారు. మార్కెట్ భయాందోళనల్లో ఉన్నప్పుడు అందరూ అమ్ముతుంటే, మీరు మాత్రం కొనుగోలు చేసి ఆ పతనాన్ని మీ సంపద వృద్ధికి ఒక మెట్టుగా మార్చుకోవాలని కియోసాకి పిలుపునిచ్చారు.

చివరిగా ఆయన ఒక్కటే మాట చెప్పారు.. "ఈ మార్కెట్ క్రాష్ మిమ్మల్ని మరింత ధనవంతులుగా మార్చనివ్వండి" అని. కాబట్టి ఇన్వెస్టర్లు భయపడకుండా సరైన వ్యూహంతో ముందుకు వెళ్లడం అవసరం.