Inflation: మరోసారి రికార్డు స్థాయిలో రిటైల్ ద్రవ్యోల్బణం.. గత నాలుగు నెలలతో పోలిస్తే..

CPI News: అభివృద్ధిలో దూసుకుపోతున్న ఇండియాను కలవరపరచే ఇబ్బంది ద్రవ్యోల్బణం. కేంద్రం సహా ఆర్బీఐ ప్రస్తుతం దీనిని అదుపులోకి తెచ్చేందుకే తీవ్ర ప్రయత్నాలు చేస్తున్నాయి. సెంట్రల్ బ్యాంక్ నిర్దేశిత పరిధికి మించి పెరుగుతుండటం ఆందోళన కలిగిస్తోంది.

డిసెంబర్‌లో రిటైల్ ద్రవ్యోల్బణం 4 నెలల గరిష్ఠ స్థాయికి చేరినట్లు నేషనల్ స్టాటిస్టికల్ ఆఫీస్ (NSO) తెలిపింది. ఏకంగా 5.69 శాతం వద్ద స్థిరపడినట్లు వెల్లడించింది. పప్పులు, కూరగాయలు వంటి ఆహార పదార్థాల ధరలు పెరగడమే ఇందుకు ప్రధాన కారణమంటూ డేటా విడుదల చేసింది. .

పరిశ్రమల ఉత్పత్తి సూచిక (IIP) కూడా నవంబర్‌లో 8 నెలల కనిష్ట స్థాయి 2.4 శాతానికి పడిపోయింది. నెల క్రితం 11.6 శాతంగానూ, ఏడాది పూర్వం ఇది 7.6 శాతంగానూ ఉందని NSO డేటా చెబుతోంది. తయారీ, మైనింగ్ మరియు మూలధన వస్తువుల ఉత్పత్తి కూడా వృద్ధి మందగించడానికి కారణమని పేర్కొంది.

వినియోగదారుల ఆహార ధరల సూచిక ప్రకారం వార్షిక ఆహార ద్రవ్యోల్బణం నవంబర్‌లో 8.70 శాతం మరియు ఏడాది క్రితం 4.19 శాతం ఉంది. ఇక డిసెంబర్‌లో ఇది 9.53 శాతానికి పెరిగింది. డిసెంబర్‌లో పట్టణ ప్రాంతాల్లో రెండంకెల మేర 10.42 శాతం ఆహార ద్రవ్యోల్బణం నమోదు కాగా.. గ్రామీణ ప్రాంతాల్లో 8.49 శాతంగా రికార్డయింది.