Credit Cards: క్రెడిట్‌ కార్డులపై రిజర్వ్ బ్యాంక్ కొత్త రూల్స్.. ఇకపై అలా చేయడం కుదరదు!

RBI New rules: ప్రజలు తమ ఆర్థిక అవసరాల కోసం క్రెడిట్ కార్డులను ఎక్కువగా ఉపయోగిస్తూ ఉంటారు. వీటికి సంబంధించి రిజర్వ్ బ్యాంక్ ఆఫ్ ఇండియా ఎప్పటికప్పుడు నిబంధనలను అప్‌డేట్ చేస్తూ ఉంటుంది. తద్వారా వినియోగదారుల అధిక ప్రయోజనాలు చేకూర్చేలా వ్యవహరిస్తుంది. తాజాగా వీటికి సంబంధించి కొన్ని మార్గదర్శకాలను ప్రకటించింది.

క్రెడిట్ కార్డుల జారీ కోసం బ్యాంకులు మరియు నాన్-బ్యాంకులు అధీకృత కార్డ్ నెట్‌వర్క్‌లతో టైఅప్ కావడంపై రిజర్వ్ బ్యాంక్ ఆఫ్ ఇండియా (RBI) ఆదేశాలు జారీ చేసింది. కార్డ్ నెట్‌వర్క్‌లు మరియు జారీచేసే సంస్థల మధ్య కొన్ని ఏర్పాట్లు వినియోగదారుల ఎంపికకు అనుకూలంగా లేవని తన సమీక్షలో గమనించినట్లు తెలిపింది.

జారీ చేయబడిన కార్డ్ ఏ నెట్‌వర్క్ కు చెందాలో ఆయా సంస్థలే నిర్ణయించడాన్ని సెంట్రల్ బ్యాంక్ తప్పుపట్టింది. ఈ కార్డ్ జారీదారులు నెట్‌వర్క్‌లతో కలిగి ఉన్న సంబంధాలపై ఆరా తీసిన అనంతరం పలు నిర్ణయాలు తీసుకుంది. అధీకృత కార్డ్ నెట్‌వర్క్‌లలో అమెరికన్ ఎక్స్‌ప్రెస్, డైనర్స్ క్లబ్, మాస్టర్ కార్డ్, రూపే మరియు వీసా లు ఉన్నాయని RBI వెల్లడించింది.

యూజర్లు ఇతర కార్డ్ నెట్‌వర్క్‌ల సేవలను పొందకుండా నిరోధించే కంపెనీలతో కార్డ్ జారీ చేసే సంస్థలు ఎలాంటి ఒప్పందాన్ని కుదుర్చుకోకూడదని తేల్చి చెప్పింది. అర్హత కలిగిన కస్టమర్‌లకు కార్డు జారీ సమయంలో వివిధ నెట్‌వర్క్‌ల నుండి నచ్చిన దాన్ని ఎంచుకోవడానికి ఆఫ్షన్ ఇవ్వాల్సిందేనని స్పష్టం చేసింది. ఇప్పటికే కార్డ్ కలిగి ఉన్న వారు రెన్యువల్ సమయంలో ఇష్టం వచ్చిన నెట్‌వర్క్‌కు మారవచ్చని పేర్కొంది.