Real Estate news: ఇళ్ల కొనుగోలుదారులకు రెరా శుభవార్త.. ఇకపై ఆ ఛార్జీలు 80 శాతం తగ్గింపు

RERA: దేశీయ రియల్ ఎస్టేట్ రంగం ప్రస్తుతం వేగంగా వృద్ది చెందుతోంది. శ్రీమంతుల దగ్గర నుంచి పేద, మధ్యతరగతి ప్రజలు సొంతిల్లు కొనుక్కునేందుకు ఆసక్తి చూపిస్తున్నారు. అయితే వారిని మరింత ప్రోత్సహించేందుకు రియల్ ఎస్టేట్ రెగ్యులేటరీ అథారిటీ ఓ కీలక నిర్ణయం తీసుకుంది.

సొంతిల్లు కలిగి ఉండాలనేది దాదాపు ప్రతి ఒక్కరి కల. దీంతో పలువురు బిల్డర్స్‌ను ఆశ్రయిస్తున్నారు. కొన్ని కారణాల వల్ల బిల్డర్ వద్ద ఇంటి కొనుగోలుకు చేసిన బుకింగ్‌ను రద్దు చేయాల్సిన అవసరం ఏర్పడుతుంది. అప్పుడు ప్రారంభంలో చెల్లించిన బుకింగ్ అమౌంట్‌లో క్యాన్సిలేషన్ రుసుము, ఒప్పంద ఉల్లంఘన జరిమానా రూపేణా భారీ మొత్తాన్ని బిల్డర్ వసూలు చేస్తారు.

కాగా ఇప్పుడు రియల్ ఎస్టేట్ రెగ్యులేటరీ అథారిటీ (RERA) సరిగ్గా ఇక్కడే ఉపశమనం కలిగించే ప్రకటన ఒకటి చేసింది. గృహ కొనుగోలుదారుల ప్రయోజనాల కోసం కొత్త రూల్ అమలుచేస్తున్నట్లు చెల్లిపంది. ఇంతకుముందు వరకు బిల్డర్లు ఇంటి మొత్తం ఖర్చులో 10 శాతాన్ని బుకింగ్ రద్దు ఛార్జీలుగా వసూలు చేసేవారు. దీనిద్వారా కొనుగోలుదారులు పెద్ద మొత్తంలో నష్టపోతున్నట్లు రెరా గుర్తించింది.

దీంతో తాజా నిబంధనల ప్రకారం ఆ ఛార్జీని కేవలం 2 శాతానికి తగ్గిస్తూ నిర్ణయం తీసుకుంది. అంటే ఇంటి బుకింగ్ రద్దు చేస్తే బిల్డర్‌కు చెల్లించాల్సిన నష్టపరిహారం.. మొత్తం ధరలో కేవలం 2 శాతం మాత్రమేనని స్పష్టం చేసింది. ఈ కొత్త నిబంధన వల్ల గృహ కొనుగోలుదారులకు చాలా మొత్తం ఆదా అవుతుంందని రెరా తెలిపంది.