Tata Nano: మళ్లీ ఫామ్‌లోకి రతన్ టాటా డ్రీమ్ కారు.. ఈసారి మాత్రం భిన్నంగా..

Tata Nano: అందరికీ తక్కువ ధరలోనే కారు అందించాలని రతన్ టాటా ఎంతగానో ప్రయత్నించారు. కేవలం ప్రయత్నంతో మాత్రమే సరిపెట్టకుండా టాటా నానోను తీసుకొచ్చి చూపించారు కూడా. అయితే కొన్ని కారణాల వల్ల చాలా కాలంగా నానో ప్రొడక్షన్ నిలిపివేయాల్సి వచ్చింది. మరోసారి ఇప్పుడు నానో కారు హాట్ టాపిక్‌గా మారింది.

టాటా మోటార్స్ ఐకానిక్ కారు నానో గురించి ఎటువంటి భవిష్యత్తు ప్రణాళికలను కంపెనీ అధికారికంగా వెల్లడించలేదు. అయితే ఎప్పటికప్పుడు దీనిచుట్టూ పుకార్లు అలుముకుంటున్నాయి. త్వరలో ఎలక్ట్రిక్ వాహనంగా నానో మార్కెట్లోకి అడుగుపెట్టనున్నట్లు పలు నివేదికలు చెబుతున్నాయి.

ఈ రూమర్ల ఆధారంగా ఒకవేళ టాటా నానో ఎలక్ట్రిక్ వెహికల్ గా మార్కెట్లోకి అడుగుపెడితే ఎలా ఉంటుందో ఊహిస్తూ, SRK డిజైన్స్ ఓ చిత్రాన్ని పంచుకున్నారు. అది కాస్తా ఇప్పుడు నెట్టింట్లో వైరల్ గా మారింది. టాటా నానో X3 ప్లాట్‌ ఫారమ్‌ను ఇందుకోసం కంపెనీ ఉపయోగించవచ్చని నివేదికలు అంచనా వేస్తున్నాయి.

ఒకవేళ అదే గనుక జరిగితే EV విభాగంలో ఇదొక గేమ్ ఛేంజర్‌ గా నిలవడం ఖాయమని నిపుణులు అంచనా వేస్తున్నారు. దేశంలో అతి తక్కువ ధరలో విడుదలైన కారుగా ఇప్పటికే నానో రికార్డు సృష్టించింది. ఇప్పుడు EV మోడల్‌ లో మరోసారి లాంచ్ అయితే, ఈ విభాగంలోనూ హిస్టరీ రిపీట్ చేయడం ఖాయంగా భావిస్తున్నారు.