Reliance: రిలయన్స్ రిఫైనరీ యూనిట్స్ మూసివేత.. మర్కెట్ వర్గాల్లో కలకలం.. అసలేం జరిగిందంటే..

Reliance: దేశంలో అత్యంత విలువైన కంపనీగా రిలయన్స్ ఇండస్ట్రీస్ కొనసాగుతోంది. ఈ గ్రూపు కంపెనీల్లో ఆయిల్ రిఫైనరీ యూనిట్లు కూడా ఓ భాగంగా ఉన్నాయి. రష్యా చమురు వల్ల భారీగా లాభపడుతున్న ఈ విభాగాన్ని మూసివేస్తున్నట్లు వచ్చిన వార్తలు కలకలం రేపాయి.

తనిఖీ మరియు నిర్వహణ కార్యకలాపాల కోసం ముందుగా నిర్ణయించిన షెడ్యూల్ కు అనుగుణంగా ఈ చర్యలు తీసుకుంటున్నట్లు కంపెనీ క్లారిటీ ఇవ్వడంతో ఇన్వెస్టర్లు ఊపిరి పీల్చుకున్నారు. ఇందులో భాగంగా జామ్‌ నగర్ ప్లాంట్‌ లోని 3 యూనిట్లను తాత్కాలికంగా మూసివేయనున్నట్లు వెల్లడించింది.

ప్రపంచంలోనే అతిపెద్ద రిఫైనింగ్ కాంప్లెక్స్ గా జామ్‌ నగర్ యూనిట్‌ ప్రఖ్యాతి గాంచింది. దీనిలో రోజుకు 1.4 మిలియన్ బ్యారెల్స్ రిఫైనింగ్ సామర్థ్యంతో కూడిన 2 ప్లాంట్లు ఉన్నాయి. వీటిలో క్రూడ్ డిస్టిలేషన్ యూనిట్‌ ను ప్రస్తుతం నిలిపివేస్తున్నట్లు ఎక్స్ఛేంజ్‌ లకు కంపెనీ తెలిపింది. సుమారు 7 వారాల పాటు మెయింటెనెన్స్ పనులు కొనసాగుతాయని స్పష్టం చేసింది.

మూసివేయనున్న 3 యూనిట్లు మినహా ఇతర విభాగాలు ఎప్పటిలాగే పనిచేస్తాయని రిలయన్స్ ఇండస్ట్రీస్ వెల్లడించింది. ఈ చర్యల వల్ల జామ్‌ నగర్ కాంప్లెక్స్ మొత్తం కార్యకలాపాలపై ఎటువంటి ప్రభావం ఉండదని చెప్పింది. అయితే వీటి మూసివేత వల్ల కంపెనీ ముడి దిగుమతులు తగ్గి, గ్యాసోలిన్ మార్జిన్‌లు పెరుగుతాయని మార్కెట్ వర్గాలు భావిస్తున్నాయి.