Reliance Retail: కిరాణా వ్యాపార వృద్ధికి అంబానీ కొత్త అస్త్రం.. ఆయనను రంగంలోకి దింపుతోంది..!

Reliance Retail: ఏ వ్యాపారమైనా విజయవంతంగా ముందుకు సాగాలంటే దానిని నడిపించే నాయకుడు సరైనవాడై ఉండాలి. ఈ క్రమంలో ఇప్పటికే ఇషా అంబానీ చేతిలో వేగంగా ముందుకు సాగుతున్న రిలయన్స్ రిటైల్ వ్యాపార సామ్రాజ్యానికి దన్నుగా నిలిచేందుకు మరో ఆయుధం లాంటి నాయకుడిని ముఖేష్ అంబానీ జోడిస్తున్నారు.

దేశంలో గుజరాత్ కు చెందిన అమూల్ బ్రాండ్ పాల వ్యాపారంలో ఎంత ప్రసిద్ధి చెందిందో మనందరికీ తెలిసిందే. దీనిని రిటైల్ చేస్తున్న గుజరాత్ కోఆపరేటివ్ మిల్క్ మార్కెటింగ్ ఫెడరేషన్ (GCMMF)కి సారధ్యం వహించిన మాజీ ఎండీ RS సోధిని రిలయన్స్ రిటైల్ వ్యాపారాన్ని ముందుకు తీసుకెళ్లటానికి అంబానీ ఎంపిక చేసినట్లు సమాచారం.

ఇషా అంబానీ నేతృత్వంలోని రిలయన్స్ రిటైల్ కిరాణా వ్యాపారంలో పండ్లు, కూరగాయల విభాగంపై సోధీ ఎక్కువగా దృష్టిసారిస్తారని అంతర్గత సమాచారం ప్రకారం తెలుస్తోంది. అమూల్ బ్రాండ్‌ విక్రయాలను పెంచటంలో ఆయన 41 ఏళ్లు శ్రమించారు. రిలయన్స్ తన సొంత FMCG ఉత్పత్తులను మార్కెట్లోకి తీసుకొస్తున్న తరుణంలో ఈ వార్తలు ప్రాధాన్యం సంతరించుకున్నాయి.

దీనికి ముందు శీతలపానీయాల వ్యాపారంలో క్యాంపాకోలాను అంబానీ సొంతం చేసుకుంది. ఈ వ్యాపారాన్ని ముందుకు తీసుకెళ్లేందుకు ఈ రంగంలో ప్రఖ్యాత వెటరన్ కోకాకోలా ఇండియా మాజీ ఛైర్మన్ T కృష్ణకుమార్ ను కంపెనీ రిలయన్స్ రిటైల్ వెంటర్స్ లిమిటెడ్ కోసం రిలయన్ ఇండస్ట్రీస్ లిమిటెడ్ నియమించుకుంది.