జియో మార్ట్ ఎక్స్‌ప్రెస్‌తో గంటన్నరలో ఇంటికి నిత్యావసరాలు

ముఖేష్ అంబానీ నేతృత్వంలోని రిలయన్స్ రిటైల్... జియో మార్ట్ ఎక్స్‌ప్రెస్‌తో క్విక్ కామర్స్‌లోకి ఎంట్రీ ఇచ్చింది. కేవలం గంటన్నర వ్యవధిలో సరుకులు ఇంటికి సరఫరా చేస్తామని ప్రకటించింది. జియో మార్ట్ ఎక్స్‌ప్రెస్ అనే కొత్త ప్లాట్‌ఫామ్ (యాప్) ద్వారా రిలయన్స్ రిటైల్ ఈ ఇన్‌స్టాంట్ గ్రాసరీ డెలివరీ సేవలను ప్రారంభిస్తున్నట్లు తెలిపింది. ప్రస్తుతం నేవీ ముంబైలో ప్రయోగాత్మకంగా ప్రారంభించారు. ఈ ఏడాది చివరి నాటికి 200 నగరాలకు/పట్టణాలకు విస్తరించనున్నారు.

ఇప్పటికే టాటా ఆదీనంలోని బిగ్ బాస్కెట్, జొమాటో ఫండెడ్ బ్లింకిట్, స్విగ్గీ ఇన్‌స్టామార్ట్, వాల్‌మార్ట్‌కు చెందిన ఫ్లిప్‌కార్ట్ క్విక్, జెప్టో వంటివి ఇప్పటికే క్విక్ సేవలను అందిస్తున్నాయి. ఇప్పుడు జియో మార్ట్ ఎక్స్‌ప్రెస్ వీటికి పోటీ ఇవ్వనుంది. 90 నిమిషాల్లో డెలివరీ హామీ ఇస్తోంది. కనీస ఆర్డర్ వ్యాల్యూ లేనప్పటికీ, ఉచిత డెలివరీ మాత్రం కనీసం రూ.199. రిలయన్స్ రిటైల్ స్టోర్స్ ద్వారా జియో మార్ట్ ఎక్స్‌ప్రెస్ డెలివరీలు చేస్తారు. మెడిసిన్స్, స్మార్ట్ ఫోన్ వంటి వాటిని కూడా అందించేందుకు రిలయన్స్ సిద్ధమవుతోంది.

రిలయన్స్ కొద్ది నెలల క్రితం క్యూ-కామర్స్ సంస్థ డుంజోలో 26 శాతం వాటాలను కొనుగోలు చేసింది. కొన్ని ప్రాంతాల్లో డుంజో ద్వారా ఎక్స్‌ప్రెస్ సేవలు అందించనున్నట్లు తెలుస్తోంది. సంప్రదాయ ఈ-కామర్స్ సంస్థల ద్వారా ఆర్డర్ చేసే వస్తువుల డెలివరీకి కనీసం ఒకరోజైనా సమయం పడుతుంది. కానీ ఇప్పుడు క్విక్-కామర్స్‌కు ఆదరణ పెరుగుతోంది.