ప్రపంచంలోనే అత్యంత వేగంగా వృద్ధి సాధిస్తున్న 2వ సంస్థ రిలయన్స్

ఆసియా కుబేరుడు ముఖేష్ అంబానీకి చెందిన రిలయన్స్ రిటైల్ ప్రపంచంలోనే అత్యంత వేగంగా వృద్ధి సాధిస్తోన్న రెండో రిటైల్ కంపెనీగా నిలిచింది. ఈ మేరకు డెలాయిట్ రూపొందించిన గ్లోబల్ రిటైల్ పవర్ హౌసెస్ 2021 ర్యాంకింగ్‌లో రిలయన్స్ రిటైల్ రెండో స్థానంలో ఉంది. అమెరికా దిగ్గజం వాల్‌మార్ట్ మొదటి స్థానంలో ఉంది. ఇక దిగ్గజ రిటైల్ సంస్థల్లో వాల్‌మార్ట్ మొదటి స్థానంలో ఉండగా, అమెజాన్ డాట్ కామ్ రెండో స్థానానికి చేరుకుంది. కాస్ట్‌కో హోల్‌సేల్ కార్పోరేషన్ మూడో స్థానంలో, జర్మనీ స్వ్కార్జ్ నాలుగో స్థానంలో ఉంది.

టాప్ 10లో ఏడు అమెరికా కంపెనీలు

టాప్ టెన్ స్థానాలలో 7 అమెరికాకు చెందిన సంస్థలు ఉన్నాయి. యూకే నుండి టెస్కో PLC(10వ ర్యాంకు) ఉంది. క్రోజెర్ కంపెనీ 5వ స్థానం, వాల్‌గ్రీన్స్ బూట్స్ అలియన్స్ 6వ స్థానం, సీవీఎస్ హెల్త్ కార్పొరేషన్ 9వ స్థానంలో ఉన్నాయి. ఇవన్నీ అమెరికా సంస్థలు. జర్మనీకి చెందిన అల్దీ ఇన్‌కాఫ్ జీఎంబీహెచ్ అండ్ అల్దీ ఇంటర్నేషనల్ సర్వీసెస్ జీఎంబీహెచ్ ఎనిమిదో ర్యాంకులో ఉంది.

3 స్థానాలు ఎగబాకిన రిలయన్స్ రిటైల్

అంతర్జాతీయంగా 250 రిటైలర్ల జాబితాలో భారత్ నుండి ఎంపికైన ఏకైక కంపెనీ రిలయన్స్ రిటైల్. గ్లోబల్ పవర్స్ ఆఫ్ రిటైలింగ్, వరల్డ్స్ ఫాస్టెస్ట్ రిటైలర్స్ జాబితాలో రిలయన్స్ రిటైల్ స్థానం సంపాదించడం ఇది నాలుగోసారి. ఇది కూడా వరుసగా నాలుగోసారి కావడం గమనార్హం. గ్లోబల్ పవర్స్ ఆఫ్ రిటైలింగ్ జాబితాలో గతంలో 56వ స్థానంలో ఉండగా, ఈసారి మూడు స్థానాలు ఎగిసి 53కు చేరుకుంది.

రెండేళ్ల క్రితం..

ఇదిలా ఉండగా రిలయన్స్ రిటైల్ వ్యాపార విస్తరణ జోరులో రెండేళ్ల క్రితం ప్రపంచంలో మొదటి స్థానంలో ఉంది. ఇప్పుడు రెండో స్థానానికి పరిమితం అయింది. 2019తో పోలిస్తే 2020లో 41.8శాతం వృద్ధి సాధించడం, స్టోర్స్ సంఖ్య 13.1 శాతం పెంచుకోవడం కలిసొచ్చినట్లు డెలాయిట్ తెలిపింది.