Reliance News: రెండక్షరాల పేరు కోసం 250 కోట్లు ఖర్చుపెట్టిన రిలయన్స్.. తప్పలేదు మరి!

Metro deal: దేశంలో అత్యంత విలువైన కంపెనీగా రిలయన్స్ ఇండస్ట్రీస్ కొనసాగుతోంది. రిటైల్ బిజినెస్‌ను మరింత విస్తరించే ప్రణాళికల్లో భాగంగా గతేడాది మెట్రోను కొనుగోలు చేసింది. ఇందుకోసం చెల్లించిన ఓ పెద్దమొత్తంపై ఇప్పుడు హాట్ టాపిక్‌ గా మారింది.

గత డిసెంబర్ లో 2 వేల 850 కోట్లు వెచ్చించి మెట్రో క్యాష్ & క్యారీ ఇండియాను రిలయన్స్ రిటైల్ వెంచర్స్ సొంతం చేసుకుంది. 31 హోల్‌ సేల్ స్టోర్లు, 6 స్టోర్ లొకేషన్లతో కూడిన రియల్ ఎస్టేట్ పోర్ట్ ఫోలియో కూడా డీల్‌ లో భాగంగా ఉంది. ఈ సేల్ మే 2023లో పూర్తయింది. అయితే ఈ కొనుగోలు అనంతరం మెట్రో AGకి RIL 254 కోట్లు చెల్లించింది.

జర్మన్ రిటైలర్ బ్రాండ్ పేరును భారత్‌ లో ఉపయోగించినందుకు సెప్టెబంరు 2023తో ముగిసిన ఆర్థిక సంవత్సరానికిగాను ఈ మొత్తం పే చేసినట్లు తెలుస్తోంది. 'కొత్త యజమాని వ్యాపార నిర్వహణకు వీలుగా మెట్రో AG కొన్ని ట్రాన్సిషన్ సేవలు మరియు లైసెన్సులను అందిస్తోంది. ఇందుకోసం 254 కోట్లను ముందస్తు చెల్లింపుగా స్వీకరించబడింది' అని మెట్రో తన వార్షిక నివేదికలో స్పష్టం చేసింది.

పెరుగుతున్న మార్కెట్ కన్సాలిడేషన్, వేగవంతమైన డిజిటలైజేషన్ మరియు తీవ్రమైన పోటీనే తన రిటైల్ బిజినెస్ విక్రయానికి కారణంగా మెట్రో పేర్కొంది. ఇండియాలో వ్యాపారం తన ప్రధాన వృద్ధి వ్యూహానికి అనుగుణంగా లేదని భావిస్తున్నట్లు చెప్పింది. లావాదేవీ ఖర్చులతో సహా ఈ డీల్ ద్వారా 1,363 కోట్లు ఆదాయం వచ్చినట్లు వెల్లడించింది.