Reliance: ఆస్ట్రేలియాలో అంబానీ వ్యాపారం..! చిన్న కొడుకు బిజినెస్‌పై స్పెషల్ ఫోకస్..

Reliance: భారత వ్యాపార దిగ్గజం ముఖేష్ అంబానీ ఎనర్జీ వ్యాపారంలో చాలా కాలంగా కొనసాగుతున్నారు. ఈ క్రమంలో రెన్యూవబుల్ ఎనర్జీ రంగంపై ఇటీవల ఫోకస్ పెంచారు.

ఈ క్రమంలోనే అసెట్ మేనేజ్మెంట్ కంపెనీ బ్రూక్‌ఫీల్డ్, రిలయన్స్ ఇండస్ట్రీస్ లిమిటెడ్ ఆస్ట్రేలియాలో పునరుత్పాదక ఇంధనం, డీకార్బనైజేషన్ పరికరాలను తయారు చేయడానికి అవకాశాలను అన్వేషించేందుకు అవగాహన ఒప్పందం కుదుర్చుకున్నాయి. దీనిలో భాగంగా PV మాడ్యూల్స్, దీర్ఘకాల బ్యాటరీ నిల్వ, విండ్ ఎనర్జీ కోసం భాగాలను స్థానికంగా ఉత్పత్తి చేయడానికి వీలు కల్పించడం ద్వారా ఆస్ట్రేలియా ఎనర్జీ ట్రాన్సిషన్ తో తోడ్పాటును అందించాలని లక్ష్యంగా ఈ అడుగు వేసినట్లు ప్రకటించాయి.

బ్రూక్‌ఫీల్డ్ రిలయన్స్‌తో కలిసి ప్రత్యక్ష మూలధన పెట్టుబడి మార్గాలను అన్వేషిస్తున్నట్లు ఎంఓయూ వెల్లడించింది. ఆరిజిన్ ఎనర్జీ మార్కెట్‌లతో సహా మార్కెట్‌లోని ఆటగాళ్లందరికీ పరికరాలను సరఫరా చేసే పునరుత్పాదక ఇంధన ప్రాజెక్టుల నిర్మాణంలో ఉపయోగించే పరికరాలను తయారు చేయడం/లేదా సమీకరించడం కోసం ఆస్ట్రేలియాలో కార్యకలాపాలను స్థాపించాలని చూస్తున్నారు. దీనికోసం అవసరమైన సోలార్ ప్యానెల్ టెక్నాలజీ, లాంగ్ డ్యూరేషన్ బ్యాటరీ స్టోరేజ్ టెక్నాలజీలో తమకు నైపుణ్యం ఉందని రిలయన్స్ తెలిపింది.

ప్రస్తుతం అంబానీ నేతృత్వంలోని రిలయన్స్ దేశీయంగా ప్రపంచంలోనే అతిపెద్ద సమీకృత పునరుత్పాదక ఇంధన తయారీ కేంద్రాలలో ఒకదానిని ఏర్పాటు చేసే పనిలో ఉంది. ఇదే క్రమంలో ఎంఓయూపై రిలయన్స్ న్యూ ఎనర్జీ లిమిటెడ్ డైరెక్టర్ అనంత్ అంబానీ స్పందిస్తూ.. రిలయన్స్ వద్ద మానవాళికి ప్రయోజనకరమైన, ప్రకృతికి అనుకూలంగా ఉండే క్లీన్ ఎనర్జీ ఎకోసిస్టమ్‌ను రూపొందించే లక్ష్యానికి కట్టుబడి ఉన్నట్లు తెలిపారు. రిలయన్స్ ఇండియాలోనే కాక ప్రపంచవ్యాప్తంగా పెట్టుబడి అవకాశాలను అన్వేషిస్తూ ఉత్సాహంగా ముందుకు సాగుతోందని తెలిపారు.