ఈ వ్యాపారాల విస్తరణకు రిలయన్స్ ప్లానింగ్.. నిధుల సమీకరణకు రుణదాతలతో చర్చలు

Reliance: దేశంలోనే అత్యధిక మార్కెట్ విలువ కలిగిన రిలయన్స్ ఇండస్ట్రీస్ నిధుల వేట మొదలెట్టింది. కంపెనీ విస్తరణ కోసం 2 బలియన్ డాలర్లు సేకరించేందుకు ప్రణాళిక రచిస్తోంది. ఇందుకోసం విదేశీ రుణదాతలతో చర్చలు జరుపుతున్నట్లు ఓ నివేదిక వెలువడింది.

బాహ్య వాణిజ్య రుణ మార్గం ద్వారా నిధులు సమీకరించాలని రిలయన్స్ యోచిస్తున్నట్లు బ్లూమ్‌బెర్గ్ నివేదించింది. 3 నుంచి 5 సంవత్సరాల వరకు మెచ్యూరిటీ వ్యవధి ఉండవచ్చని తెలిపింది. రాబడిలో కొంత భాగాన్ని.. సెప్టెంబర్‌లో మెచ్యూర్ అయ్యే రుణాల రీఫైనాన్స్ చేయడానికి కూడా ఉపయోగిస్తారని అభిప్రాయపడింది.

బ్యాంక్ ఆఫ్ అమెరికా, సిటీ గ్రూప్ మరియు స్టాండర్డ్ చార్టర్డ్ వంటి రుణదాతలతో చర్చలు జరిగినట్లు నివేదిక పేర్కొంది. రిలయన్స్ తన చమురు, రసాయనాల వ్యాపారాలు విస్తరించడానికి ప్రయత్నాలు ముమ్మరం చేసింది. 5 సంవత్సరాలలో 75 వేల కోట్ల మేర పెట్టుబడి పెట్టాలని యోచిస్తున్నట్లు గతేడాది ఆగస్టులో తెలిపింది.

ఒకపక్క దేశంలో 5G సేవలను వాయువేగంతో విస్తరించే పనిలో రిలయన్స్ ఉంది. మరోపక్క స్ట్రీమింగ్ ప్లాట్‌ఫారం జియో సినిమా విషయంలోనూ దూకుడుగా వ్యవహరిస్తోంది. కొత్త కంటెంట్ డీల్స్, ప్రసార హక్కుల కొనుగోళ్లు, గ్రీన్ ఎనర్జీ ప్రాజెక్ట్స్‌లో పెట్టుబడులు పెట్టేందుకు బిలియన్ల కొద్దీ ఖర్చు చేస్తోంది. అనతరం క్రికెట్ టోర్నమెంట్స్‌ను తన ప్లాట్‌ఫారంలో ఉచితంగా అందిస్తోంది.